السر وراء عرض الاعلانات المحرضه على شاشات التلفزيون - اعلان شيبسى الجديد دعوه لترك العمل وجهينه ميكس يدعو للفوضى
حاجه كده هاقولكم عليها
وهاقولكم على موقف خلانى ادمج المعلومتين ببعض
طبعا كالعاده الواحد بيهاتى وبينبح فى صوته عشان يقول للناس خلوا بالكم الاعلانات والتلفزيون وسيله من وسائل غسيل المخ .. وكالعاده فى اللى مقتنع وفى اللى مش مقتنع !
اعلان التلفزيون بيعتمد زى ما معظمكم عارف على البرمجه اللغويه والعصبيه
بيلعب على مشاعرك .. بيلعب على نقطة ضعفك
وكمان بيعتمد على الالوان والموسيقى بشكل معين للتأثير على العين ومن خلالها التأثير على المخ عشان يقودك بشكل انت لا تشعر به
- من كام يوم .. كنت مع واحد صاحبى هو مهندس الكترونيات
المهم كنا زهقانين فقالى نروح البيت عندى نسهر وبالمره اظبط الريسيفر بتاعى لان من كتر الشغل انشغلت والقنوات معظمها رايح ( باب النجار مخلع )
كان بيظبط القنوان ..وعلى قمر من الاقمار وهو بيظبط القنوات جت قناه اجنبيه بتعلن عن ساعه .. ساعه شكلها شيك اوى
وكان الاعلان كله مجرد كلام عادى بس قايم على ايقونه واحده
او فى حاجه اساسيه الاعلان شغال عليها للترويج للساعه وهى :
ان الساعه مزوده بصوت منبه قوى مما يساعدك للقيام فى موعد عملك دون تأخير !
نقطه ومن اول السطر ومات الكلام
الناس دى عارفه بتعمل ايه .. الناس دى حياتها كلها شغل وبس
جايب ساعه .. ماتكلمش عن شكلها ولا جمالها ولا اى حاجه..
اختار ميزه انها فيها منبه يصحيك وقت شغلك فى معادك مظبوط
اعلان زى دا مش بس بيثبت ان الناس دى مقدره الشغل انما من خلال الاعلان شوفوا كام واحد ممكن يهتم بشغله ويصحى فى معاده .. ماهى دى برمجه عصبيه برضو..ماهو كل حاجه ليها جانب ايجابى وسلبى !
** تعالى بقى فى مصر
وانا فاتح التلفزيون بتفرج على اعلان شيبسى ..
جايبلك واحد بيزوغ من شغله .. والمدير بتاعه بيطلع يقوله انت مزوغ من شغلك وسايبنى لوحدى .. والتانى اصحابه بيضحكوا .. وبياكلوا الشيبسى ويقولك شيبسى للرجاله وبس والراجل من حقه يعيش !!!
نفس اعلان الساعه .. نتكلم عن اعلان شيبسى
اولا الاعلان بيعكس مدى تفكير الشعب المصرى بالنسبه للشغل.. انه شىء مقرف وانه شىء يستحق الهروب منه .. الاعلان بيعكس ثقافة الشعب !
النقطة التانيه الاعلان بيبرمجك انك تزوغ من شغلك..عادى .. وايه يعنى .. انت راجل والراجل لازم يعمل كده .
وياريت محدش يقولى ياعم دا اعلان .. حضرتك فى ناس شنقت نفسها متأثره بلعبة فيديو جيم .. وفى افلام عدلت قوانين فى المجتمع .. وفى اعلان زى جهينه بيتعرض لحد النهارده بينزل فيه الالتراس يخطف الكوره ويجرى ويقولك يا ميكس يا جامد
كل دا غسيل مخ !
_ اخيرا .. لماتلاقى طفل 15 سنه ( والله الموقف د حصل )
راجع بيته بطنه هاتتقطع وبيرجع .. ويسأله اهله مالك ويقول مفيش
وبعدين بعد ضغط عليه يقولهم اصل انا واصحابى جيبنا الشيبسى الجديد اللى بالشطه واتراهننا مين ياكل اكتر واكتر واحد ياكل منه هايبقى راجل ( الشبيسى مكتوب عليه للرجاله وبس ) والله الموقف دا حصل
** بالنسبه لاعلان جهينه ميكس .. هل من الطبيعى ان نرى اعلان يتضمن مباراة كرة قدم والجمهور مولع شماريخ وينزل ( ميكس ) الشخصيه الكرتونيه فى الاعلان ويخطف الكره ويجرى بها والشرطه تجرى خلفه ثم يقول الاعلان ( يا ميكس يا جامد ) وكأن تلك دعوه للفوضى والنزول الى الملاعب وان ما فعله فى الاعلان شىء جيد ويعبر عن القوه
- دققوا فى كل حاجه .. هاتعرفوا مين بيلعب فى مخ العيال وبيخلقلك التراس و طلاب بيغتصبوا زميلتهم وبلاوى تانيه كتير
اسف للاطاله
E.E
Eslam Elbahrawy
منشور by Eslam Elbahrawy.
