بالفيديو تامر امين يبرأ مبارك من موقعة الجمل ولكنه يتراجع فى نفس اللحظه خوفا من الهجوم عليه
دايما كده لما تروح مناطق شعبيه تسمع امثال حلوه
مره كده سمعت مثل بيقول
عينى فيه .. و اقول اخيه
يعنى ابقى عاوز الحاجه واقول مش عاوزها
او ابقى نفسى اقول كلمه .. ومش قادر اقولها !
الحج تامر امين امبارح كان بيتكلم عن ذكرى موقعة الجمل
وبدأ يتكلم .. ويحكى عن يوم الموقعه
سبحان الله .. الرئيس مبارك قال ان التاريخ سيذكر ما له وما عليه
والراجل اهو وهو قاعد بيرجعله حقه من نفس الناس اللى قالت عليه انه مدبر موقعة الجمل وانه كلف احمد شفيق للتخطيط لها
الاخ تامر ابتدى كلامه بجمله حس انها ورطته
قال انا بعتبر نجاح الثوره كان يوم موقعة الجمل لان دا اليوم اللى سقطت فيه الداخليه ( هنا شعر تامر امين انه لخبط الدنيا.ازاى تفخر بسقوط الداخليه .. وازاى تعترف ان ثورتك اللى بتقول سلميه اسقطت الداخليه ) فرجع وصلح الكلام وقال..بس دا مايمنعش ان عمليات حرق الاقسام واقتحام السجون مالوش علاقه بالثوره الطاهره اللى نزلت ؟
الله..؟ ايه يا عم تامر .. هى ثوره نجحت بعد ما اسقطت الداخليه
ولا ثوره طاهره احرقت السجون والاقسام !
ثم يكمل كلامه ويقول ان الامور كانت عاديه فى يوم 1 فبراير لحد ما الرئيس مبارك قال الخطاب العاطفى الشهير وبعدها بدأت الامور تهدأ .. فكان فى ناس وجماعات لم يكن من مصلحتها الامور تهدأ .. فقاااااااااااااااااامت غزوه على الثوار فى التحرير من قبل مجموعه من البلطجية !!
ثم حس الاخ تامر انه كده بيبرأ مبارك وبيقول كلام حلو فى حقه وهايخسر كده .. فراح حالف يمين تلاته على الهواء ان دا ليس دفاعا عن مبارك !!!
برضو مبدأ امسك العصايه من النص حلو
ثم يكمل تامر امين قائلا
كان فى جماعات مش من مصلحتها ان بعد خطاب مبارك العاطفى الميدان يفضى وتهدأ الاحداث..فكان من مصلحتها توليع الامور لان الولعه تخدم جماعات بعينها .. فموقعة الجمل تم تدبيرها بتفكير شيطانى.. انهم ينزلوا ناس يقتلوا المتظاهرين ويتقــــــــــــــال ان نظام مبارك اللى بعتهم يقتلوا الناس والمتظاهرين .. فيبقى الميدان مشتعل كما هو وعلى المتضرر اللجوء للاخوان !!
واستشهد تامر بكلام اسامه ياسين الارهابى وزير الشباب فى عهد الاخوان لما اتكلم عن الفرقه الاخوانيه اللى قتلت الناس من فوق اسطح عمارات التحرير
ياه على الزمن
من اربع سنين كان تامر ورفاقه فى الاعلام الملوث بيقولوا ان مبارك بعت البلطجيه تقتل الناس وان الحرس الجمهورى بنفسه اللى كان فاتح طريق للبلطجيه من نزلة السمان لحد التحرير بأوامر من مبارك .. وان شفيق بعد ما تولى الوزاره بكام ساعه هو اللى خطط للموقعه وايده ملوثه بالدماء ... والكلام دا ماكانش فى الاول بس هانقول انهم كانوا مغيبين ..لا .. الكلام دا لحد شهور فاتت كانوا بيقولوا كده ..رغم انهم شافوا فيديوهات واحكام وقضايا وشهود يقولوا عكس كده .. لكن كل فتره ليها هدف .. وليها الكلام اللى يقولوه
انا مبسوط ان الخونه او المأجورين بينكشفوا و المغيبين بيفوقوا وبيعترفوا بأخطائهم .. ومبسوط ان حق مبارك بيرجعله من غير ما يتحرك او يتكلم
ولسه التاريخ هايكشف كتييييييييير
E.E
Eslam Elbahrawy
منشور by Eslam Elbahrawy.
