تصحيح الاخطاء التاريخيه - الحمله الفرنسيه لم تدمر أنف ابو الهول - صوره لرسام دنماركى تكشف الحقيقه
طيب
اكيد انتوا عارفين حاجه من الحاجات الاساسيه فى شغفى الخاص هو التاريخ وخاصة تاريخ الحضاره المصريه القديمه
ودايما عندى هدف وهو اثبات ان كتير من اجزاء التاريخ عامة والتاريخ الخاص بالحضاره بتاعتنا خاصة تم تحريفه او تغييره
طبعا الصوره فى البوست مش محتاجه توضيح ..
الصوره لتمثال ابو الهول .. التمثال الغامض واللى له اهميه كبيره كرمز اثرى بالنسبالنا كمصريين ولكن قيمته تتعدى وتتضاعف مئات المرات لدى اخرين يمثل لهم ابو الهول شىء اخر وهدف اكبر من انه مجرد تمثال أثرى !
1- اكيد شايفين ( أنف ) ابو الهول مكسوره
2- طبيعى لو سألتكم مين اللى كسرها .. اكيد كلنا عايشين على المعلومه اللى اتقالت لنا على مدار السنين ان نابليون بونابرت هو اللى كسرها .. و ان دا حصل من خلال معركه اسمها موقعة الاهرام .. كانت تدور بين الجيش الفرنسى وقوات المماليك .. وفجأه جيش نابليون اطلق من المدفع قذيفه حطمت أنف ابو الهول
3- طب لو قولتلك ان كل دا غلط .. ومش دا اللى حصل
اكيد هاترد تقولى ازاى ..؟
هاقولك ان معركة الاهرام دى كانت على شاطئ النيل فى امبابه
انت متخيل المسافه اد اااايه؟؟؟
ازاى قذيفه هاتوصل من امبابه لحد أنف ابو الهول ؟؟
دا زمان كمان ايام المدفع اللى شبه مدفع رمضان .. يعنى حتى ماكانش فى صواريخ ولا اباتشى !!!
فطبيعى من الهذيان انك تصدق ان فى قذيفه عدت من امبابه لحد هضبة الاهرامات !
4- هاتقولى مش شرط وكلامك مش مقنع ومفيش دليل.. هاقولك عندك حق
لكن هاطلب منك تبص للصوره بتاعت البوست تانى .. لقيت أنف ابو الهول مكسوره فى الصوره صح ..؟ يعنى اللى رسمها .. راح قصاد ابو الهول لقى مناخيره مكسوره فرسمه زى ما هو كده
5- هاتقولى انجز .. حاضر
هاقولك هل تعلم ان اللى رسم الصوره دى مستكشف دنماركى اسمه فريدريك نوردن .. وان ملك الدنمارك وقتها ارسله مخصوص لاستكشاف مصر والسودان ورسم كل المعالم هناك !
6- هاتنفخ وتقولى برضو ايه الجديد ...؟
هاقووولك .. ان .. الجديد يا سيدى
ان معركة الاهرام اللى بيقولوا ان الفرنسيين دمروا فيها أنف ابو الهول
كانت سنة 1798 ميلاديا ..
بينما يا سيدى رحلة الراجل الرسام الدنماركى لمصر وتصويره لصورة ابو الهول كانت سنة ................. 1737 ميلاديا
اطرح بقى ..
1798 - 1737 = 61 سنه
يعنى الصوره اترسمت وأنف ابو الهول مكسوره قبل المعركة اللى بيقولوا ان أنف ابو الهول اتكسرت فيها ب 61 سنـــــــــــــــــــــــه !
ايه رأيكم ..؟
النت موجود عندكم كلكم وممكن تتأكدوا من المعلومه
اكيد هاتيجى فى اخر البوست وتقولى .. امال مين الى كسرها ؟؟
بص يا سيدى .. فى اقاويل كتير
لكن احد تلك الاقاويل مؤرخ ومثبت فى كتاب قديم للتاريخ
وبتقول المعلومه :
يقول المؤرخ المقريزي في كتابه (( المواعظ والاعتبار في ذكر الخطب والآثار )) الجزء الأول 26 / 167 " وفي زمننا كان شخص يعرف بالشيخ محمد صائم الدهر قام في نحو من سنة ثمانين وسبعمائة لتغيير أشياء من المنكرات وسار إلى الأهرام وشوّه وجه أبي الهول وشعثه فهو على ذلك إلى اليوم "
** المقريزى اللى عاش فى القرن الخامس عشر .. يعنى 1500 ميلادى
بيقول ان صائم الدهر دا حطم التمثال سنة 780 هجريا
يعنى 780 هجريا (1359م)
** اخيرا بمناسبة ابو الهول ...
التمثال فى خطر الايام دى ومحدش بيتكلم
علماء اثار مصريين صرخوا من سنوات ان التمثال تحته مياه جوفيه ادت الى وجود رشح فى الجزء الاسفل من التمثال ولكن بعد التجاهل اصبحت المياه تحيط من التمثال فى كل مكان
كشف الباحث الأثرى، أمير جمال، أن تمثال «أبوالهول» يتعرض لمخاطر بسبب المياه الجوفية التى أصبحت تحيط به من كل جانب، والتى لم يعد يقتصر وجودها فى المنطقة أسفل التمثال، لكنها تملكت من الجسد نفسه.
وقال الباحث، لـ«المصرى اليوم»، إن أكبر دلـيل على ذلك هـو وجود النجيلة الخضراء على بعد خمسين مترًا فقط من «أبوالهول»، مضيفًا أن السبب وراء ذلك هو أن «الحجر الجيرى» المنحوت منه جسد تمثال أبوالهول، والمعروف باسم «لايم ستون»، به نسبة كالسيوم عالية جدا، وتصبح كالسيوم طبيعى عندما تختلط بها المياه،
وأوضح «جمال» أن الطيور تحب الكالسيوم، ولهذا تجدها تنقر فى جسد أبوالهول من كل جانب، إضافة إلى مشكلة الصرف الصحى، الذى يتجاهل المسؤولون علاجها حتى الآن، وبالتالى فإن جسد التمثال فى خطر.
وأكد «جمال» أن الكارثة تتمثل فى أن هذه الطيور عندما تقف على جسد التمثال، تترك فضلاتها، وهذه الفضلات تكوّن فجوات على جسد أبوالهول، تتسع هذه الفجوات مع الزمن، مما يشكل خطورة عليه.
E.E
Eslam Elbahrawy
منشور by Eslam Elbahrawy.
