بعد حادث جمهور الزمالك - الجميع مخطىء وهذه رؤيتى لموقف الرئيس السيسي
هاقول الكلمتين واخلص
اللى عاوز يهاجم يهاجم .. واللى عاوز يلغى صداقه يلغى
بس بصراحه لما بتخنق مابعرفش اسكت
بخصوص اللى حصل النهارده قبل ماتش الزمالك ولسه هايحصل
نلخص كام نقطه فى السريع
1- سيادة الرئيس مش دايما مبدأ ( كله بالحنيه يلين ) هايمشى .
الواحد بيبقى دمه بيغلى وانت بتقول على 25 يناير ثوره ونيجى نتكلم يقولولنا اسكتوا يا بهايم دى خطه .. ماشى
انما كانت النتيجه ان كل مره بتعترف بيها ثوره .. امثال علاء وابو النجا واسماء بيهيجوا علينا وبيتعملهم سعر بعد ما كانوا خلاص اندفنوا !
ودايما الرد ان الريس مايقدرش يخالف الدستور ويقول ناها مش ثوره ..ايوه بس يقدر يتجاهلها بذكاء زى ما تجاهل احداث وشخصيات كتير بذكاء فى خطاباته !
2- حضرتك عارف ان الالتراس بيتمول وبياخد فلوس..وشوفت وهما بيكسروا ويحرقوا ويخربوا .. يبقى المطلوب اننا نواجههم بالقانون ..لكن حضرتك فى حوار ليك قلت ان عاجبك الصور والرسومات اللى بيعملها الالتراس فى الدخلات..وبالتالى برضو عملتلهم سعر من اول وجديد والنتيجه اهو حضرتك شايفها
3- سؤال .. كان هايجرى ايه لو الدورى كملناه من غير جمهور !!
الداخليه عماله تحارب ارهاب و زفت واحنا رايحين ننزل قرار ان الجمهور يرجع خاصة وانك عارف ان الالتراس متربص وان الفتره دى اى حد حتى لو مش التراس .. هايدخل الاستاد ويعملك قلق لان الفتره الحاليه الارهاب ممكن يضربك فى اى مكان
4- جمهور الزمالك .. عاوز اقولكم لو صح اللى بيتقال ان التذاكر ماكانتش بتتباع فى منافذ البيع وان التذاكر اتسلمت لمرتضى منصور عشان يوزعها على مزاجه ومايديش للالتراس تذاكر لانه على خلاف معاهم .. كده يبقى رئيس النادى بتاعكم هو اللى باعكم
5- وزير الداخليه .. لو حضرتك قادر تأمن .. أمن
لو حضرتك مش قادر قول مقدرش.. انما بصراحه .. فى اى مكان فى العالم اما ابيض او اسود
لو ابيض واقدر أأمن .. يبقى الناس تخش بطريقة اّدميه
لو اسود وخايف ان حد يعمل حاجه ومقلق .. يبقى مانقولش الجمهور يحضر
6- البلد دى فيها حد عاوزها تفضل كده
فى حد دايما عاوز يخلى المشهد يكون
داخليه VS اى حد
الداخليه ضد الالتراس .. الداخليه ضد الناس .. الداخليه ضد اى حد
فى حد دايما يخطط الطبخه عشان يخلى المواجه دايما مع الشرطه
النهارده المشكله مشكلة نادى انبى ونادى الزمالك لان الناس مش لاقيه تذاكر .. فجأه يتحول الموضوع لصراع بين الشرطه والجماهير اللى عاوزه تدخل بالعافيه
7- جمهور الزمالك .. سواء كنت التراس ولا اى حاجه
وجود الخطأ لا يبرر القيام بخطأ اخر
يعنى لو صح انكم مش لقيتوا تذاكر فى منافذ البيع
ف دا مش يبرر انكم تقتحموا الاستاد وتحضروا بالعافيه لان دا مش سوق
دا قانون وعدد مسموح بيه والداخليه مهمتها انها لو وجدت معاك تذكره تدخلك ولو مش معاك مش هاتدخل .. زى ما بيحصل فى الحفلات .. لما بروح حفله من غير تذكره ..لو وقفت على دماغى مش بدخل !
8- اخير .. المواجهه مش هاتنتهى
المواجهه عشان تنتهى لازم زى ما الريس بيقول كلنا نشتغل
ماينفعش احنا نشتغل ونقول الالتراس بيخرب
والريس طلع يقول بحب رسوماتهم
ماينفعش احنا نشتغل ونقول من اجل الامان الغى حضور الجمهور
والداخليهتطلع تدى قرار بحضور الجمهور
المثل بيقول
يا نعيش عيشه فل .. يا نموت احنا الكل
وبالشكل دا ..؟ هايموت كتير وكل يوم
لان فى مفاهيم مش واضحه ... وفى ناس مش واضح موقفها
مره مع..مره ضد .. ودايما الكلمه اللى بتتقال ( اسكت دا تخطيط على تقيل )
معتقدش فى حد ممكن يخطط على تقيل عشان يوصل لنتيجه معينه تكون الحصيله فيها قتلى كل يوم !
انا قلت الكلمتين
وخلصنا وزى ما تيجى تيجى
تطلع وجهة النظر صح او غلط .. المهم ان الواحد بيتكلم
E.E
Eslam Elbahrawy
منشور by Eslam Elbahrawy.
