خلاصة القول فى موضوع شيماء الصباغ وتحويل ضابط امن مركزى الى النيابه بتهمة قتلها

خلاصة القول فى موضوع شيماء الصباغ وتحويل ضابط امن مركزى الى النيابه بتهمة قتلها 

طب نقول الكلمتين عشان ننجز

بغض النظر عن صحة الخبر بتاع احالة ضابط امن مركزى فى تهمة شيماء الصباغ الى النيابه !

لازم نقول كام نقطه

اولا ... لو هو اللى قتلها يتعاقب طبعا وتحيا دولة القانون مفيش كلام

ثانيا ... الغى بقى قانون التظاهر لان اتحداك لو فى ضابط رضى ينزل يأمن مظاهره بعد كده .. هاترجعوا الناس لايام ما بعد 25 يناير .. اللى كان الضابط فيها شايف الجريمه بتحصل وخايف يدخل يمنعها احسن يتقبض عليه ويترمى فى السجن زى باقى زمايله

ثالثا .. عاوز نعرف تفاصيل امر الاحاله دا

ماهو الشرطه ليها خرطوش عيار معين .. وشيماء انضربت بخرطوش بعيار مختلف

رابعا .. اياك وفكرة كبش الفداء !

خامسا .. طلع بقى قانون جديد ضد التظاهر

يصرح فيه للضباط بحمل النبله والاستك والمصاصه

عشان لو حصل تجمع غير قانونى بدون اذن من القانون .. يدخل الضابط يضرب المتظاهرين بالاستك والمصاصه عشان محدش منهم يموت وان كنت اشك ان وقتها هايكون عندنا شهيد المصاصات برضو !

سادسا ..

سؤال يطرح نفسه .. فى مظاهره يا دوب لم تزيد عن 30 او 40 واحد

ايه اللى يجبر الضابط انه يضرب خرطوش

لم يكن هناك اشتباك او مولوتوف او اى شىء خطر

مش غريبه برضو !!

سابعا

لو ان الامور كانت هادئه وفى ضابط ضرب الخرطوش متعمد

اكشفوا لنا عن هويته .. جايز نعرف توجهاته

اصل كل شىء جايز فى البلد دى

واسأل عن الضباط الملتحين

ثامنا ..

الله يرحم كل من مات ... انا مش بتكلم عن حد مات وراح عند ربه

انا بتكلم عن الكلام والحيثيات اللى بعد كده

تاسعا ..

عندنا فى الشارع المصرى دايما يقولوا

اللى يحضر العفريت ومايعرفش يصرفه .. يستحمل اذاه

يعنى اللى ينزل مظاهره ضد القانون وبدون تصريح يتحمل

هاييجى حد يقولى يعنى نقتلهم لانهم مش معاهم تصريح

هاقولك لا .. بس فلنفرض ان واحد عنده ربو على صدره

والشرطه قاومت المتظاهرين بالغاز..والاخ دا اختنق بسبب المرض اللى عنده .. ومات..هنا مين غلطان .. الشرطه اللى بتطبق قانون . ولا الاخ المريض اللى نزل مخالف للقانون !!!...

سلامو عليكو

E.E

Eslam Elbahrawy

‎‎منشور‎ by Eslam Elbahrawy.‎