خطة اسقاط ماسبيرو المبنى السيادى لهدم الرمز - ابله فاهيتا و أراء تطالب بتحويل ماسبيرو الى مدينة ملاهى




خطة اسقاط ماسبيرو المبنى السيادى لهدم الرمز - ابله فاهيتا و أراء تطالب بتحويل ماسبيرو الى مدينة ملاهى

ماسبيرو .. 

ماسبيرو الوحش لازم ندمره 
ماسبيرو الوحش لازم نخصخصه 
ماسبيرو الوحش لازم نهده 

محدش فينا ينكر ان ماسبيرو بينهار بالشكل دا
محدش فينا ينكر ان ماسبيرو اصبح غير مفيد ( اعلاميا )
محدش فينا ينكر ان ماسبيرو مازال مخترق من بعض التوجهات 

لكن .. كان ومازال وسيظل مبنى سيادى لا يمكن الاستغناء عنه .. تلفزيون الدوله زيه زى اى جهه سياديه .. شوف فى العالم كله .. اى قرار او ثوره او تعديل حكومى او حتى لو انقلاب فى اى دوله بالعالم .. لو اتذاع فى كل قنوات الدنيا .. لا يعترف به الا لو اتذاع على تلفزيون الدوله 

ماسبيرو المبنى السيادى .. مش مجرد قنوات تلفزيون وبرامج
ماسبيرو رمز للدوله المصريه
مش كلام شعارات ولا افلام انما دى الحقيقه 

** افتكر الحرب اللى حصلت فى اخر ساعه قبل اذاعه بيان 30 يونيو و 3 يوليو عشان يوصلوا الخطابات لمبنى التلفزيون عشان تتذاع منه ! 

الخونه عاوزين يوقعوه .. عاوزين يلغوه خالص
ويقولك ايه لازمته .. ويتعمل مكانه ى حاجه تانيه 
وكأن الكل تناسى ان بداية السيطره على الدوله تأتى من خصخصة مؤسساتها 

فى حلقة ابله فاهيتا الاسبوع اللى فات .. تم تخصيص اكثر من نصف الحلقه للحديث عن الغاء ماسبيرو والاستغناء عنه ..




واستطلعوا رأى شوية عيال صغيره وشباب تافه مايعرفش حاجه وتبع البرنامج .. وكانت الاراء بتاعت شباب المستقبل الجميل تندرج تحت الاتى:
واحد يقولك نعمله فندق واوض ونأجره
واحد يقولك نعمله متحف
واحده تقولك نعمله اكوا بارك
واحده تقولك نعمله سوبر ماركت
واحده تقوله نعمله كافيه !

عاوزين يهدوا اى رموز للبلد
احرق المجمع العلمى .. اقفل ماسبيرو .. فجر المتاحف 
اى رمز عريق فى البلد امحيه .. عشان تطلع جيل جاهل زى اللى اتكلم دا

انا عاوز اقول رساله للرس 
ماسبيرو محتاج اعادة هيكله ياريس 
انت تقدرتستفيد من تلفزيون الدوله دا وتدخل مليارات 
بس استعين يالخبرات مع التطعيم بالشباب عشان يقوموا المبنى تانى

ياريس انت عندك قطاع اسمه قنوات النيل المتخصصه 

قناة النيل للاخبار .. العالم كله بيكون جايب اخبار عاجله اول بأول
وهى القناه الوحيده اللى جايبه الاستاذ شمال يمين يحلل اسباب نكسة 67.؟
او اسباب خروج الملك فاروق من مصر !!

قناة النيل للرياضه يا ريس 
بينقلوا الماتشات بعد بدايتها بخمس دقايق 
بيجيبوا معلقين بيقولوا اسماء اللاعيبه غلط وبيقولوا بدلها اسماء لاعبين ماتت من 20 سنه
العالم كله بيكون بيذيع الماتشات والبطولات العالميه مباشر وقناة النيل للرياضه بتكون ذايعه ماتش للكاميرون فى اولمبياد عام 60 ولا 70 .. او ماتش من كاس العالم 82 !!!

قناة النيل الثقافيه ياريس
اللى بيتفرج عليها 20 نفر منهم 18 شغالين فيها
برامج عقيمه واداء عقيم غير متماشى مع العصر
القنوات الثقافيه كلها بتقدم افلام وثائقيه جديده وبتعمل ندوات لمناقشة الاوضاع الراهنه .. وقناتنا لسه بتجيب ناس تقول دواوين شعر عن الحب فى زمن الكوليرا 

قنوات الدلتا والصعيد والقاهره يا ريس 
محدش حاططها على الريسيفر بتاعه
ديكور سىء واعلاميين اسوأ وبرامج تشل ماتت فكرتها من خمسين سنه 

القناه الاولى والفضائيه يا ريس لسه بثينه كامل النكسجيه بتقول نشرة الاخبار فيهم .. ولسه فيهم نشرة اخبار بتتصل بالمراسل وتطلع النمره غلط على الهوا !!

** المفروض ان الزمن بيتقدم يا ريس والقنوات تتقدم
انا فاكر من 15 سنه كنا بنجرى نشترى البوستر ( الاريال بالموتور ) عشان نجيب القناه التالته والرابعه لان برامجهم حلوه .. 
المفروض مع تقدم التكنولوجيا والزمن كانوا يتقدموا مش ينتهوا 

** محتاجين ناس شباب وناس خبره يتحداو مع بعض
الخبر فى التنسيق والشباب فى صنع الافكار الحديثه 
ووقتها هاتطلع قنوات ببرامج تجيب متابعه واعلانات وتاخد فلوس !

E>E
Eslam Elbahrawy

ماسبيرو .. ماسبيرو الوحش لازم ندمره ماسبيرو الوحش لازم نخصخصه ماسبيرو الوحش لازم نهده محدش فينا ينكر ان ماسبيرو بي...










Posted by