شاهد المصرى الحقيقي - بيفطر على الارض فى الشارع - راضى ومش بيدعى على البلد
ام ابراهيم وعم جمال
عاوز تشوف مصر بجد .. بص على الناس دى
بس على الناس اللى تعبانه وبتفطر برا بيتها بعيد عن ولادها
بس راضيين وحامدين وشاكرين ومحدش فيهم فكر يعمل حاجه غلط
المراسل بيسأل ام ابراهيم بيقولها كل يوم بتفطرى برا البيت
قالتله اه طول الشهر
طب ولادك مش بيزعلوا
اكيد بيزعلوا طبعا
طب بتقوليلهم ايه
بقولهم دى لقمة عيشى هاعمل ايه يعنى
انتى بتشتغلى هنا فى العجوزه طب ساكنه فين؟؟
فى شبرا الخيمه
ياااه دا بعيد اوى؟
اعمل ايه .. عشان أأكل عيالى جنيه حلااااااااال
طب بتفطرى ايه وانتى فى الشارع كده؟
والله مش بنشترى حاجه .. الاكل بيجى من باب الله واحنا قاعدين
** شايفين ؟؟ صورتها اللى فى البوست دى وهى بتضحك .. كانت بتبتسم وهى بتقول ان الاكل بييجى من باب الله واحنا قاعدين ..كأنها فرحانه ان ربنا فاكرها..راضيه ومش عابسه ولا قافله وشها ومخنوقه وبتدعى على البلد واللى فيها ...
عم ابراهيم المراسل بيسأله
ايه احلى حاجه فى الفطار برا البيت
والله مالوش حلاوه خالص .. لو اكلت ملح فى البيت بيكون احلى من اللحمه لو هاكلها فى الشارع
طب ليه مابتروحش موائد رحمن؟
بيرد بكل خجل بيقوله مقدرش والله بتكسف بس انا بجيب فول وطعميه وفى ناس بتجيبلى اكل بس الاكل اللى بشتريه بيكون احلى smile رمز تعبيري
** اقسم بالله تقرير لو قعدتم قصاده هاتعملوا زيى .. تعيدوا الكلام .. تركزوا فى ملامح الناس دى .. وهى راضيه وبتبتسم وهى قاعده بتفطر كل يوم على الرصيف عشان تبيع كيس عيش بجنيه ولا كوز دره بجنيه .. ناس الكلمه طالعه منها بكل تلقائيه .. ولا فريق عمل فاهيتا قالهم قولوا اسم موقع جنسى وظبط معاهم ..ولا قناة الجزيره قالتلهم اشتموا فى البلد .. ناس حامده ربنا
** بصوا على الناس دى .. شوفوهم
لو معدى عليهم وقت فطار .. اعمل اللى ربنا يقدرك عليه
الراجل رغم انه فارش وقاعد على الارض بس عزة نفسه مانعاه يروح مائدة رحمن
والله العظيم دول ضافرهم برقبة ناس كتير بتاخد الاولوفات ومعترضه ومش راضيه
** ربنا يراضينا دايما
ويدوقنا طعم اللقمه الحلال على طول
E.E
Eslam Elbahrawy