مائدة افطار الاسكندريه - تشويه الحدث وتهويل الاخبار
#مائدة_الافطار_فى_الاسكندريه
طبعا الكل منتظر منى انزل شتيمه فى المحافظ وانه فاشل
وان الحفل باظ و ان و ان و ان !
بصوا ...
للاسف فى ناس بتحاول تستغل كرهكم للاشخاص وبتقدر تسود الصوره فى عيونكم ...
خلونا نتفق ان فى انتقادات كتير جدا للمحافظ بتاع اسكندريه
واهل اسكندريه فعلا بيعانوا من حاجات كتير اهمها الزباله !
والكلام عن جنسيته و زوجته اللى بتروح فى كل حته وكل الكلام دا
لكن هو فى حد بيعمل كل حاجه غلط .. مالوش حسنه واحده؟؟
لكن لان احنا عندنا اعلام مأجور اصلا سواء مقروء ولا مرئى .. بيقدر يلعبها صح .. المحافظ لو عمل اى حاجه ايا كانت .. هايحاولوا يشوهوها و دا هايحصل بسهوله نظرا للخنقه اللى جواكم من ناحيته
انا عاوز بس اقولكم حاجه بسيطه
من كام يوم .. كان معزوم عندنا قرايبنا على الفطار
احنا اسرتنا 5 افراد والضيوف 4 افراد .. يعنى 9 افراد
تخيل بقى ان اليوم دا حصل مشاكل والعيال والشقاوه والاكل اللى كان هايبوظ والنقااشات والخلافات والسياسه والمسلسلات .. كل دا فى اربع جدران بين 9 افراد ... فهل لك ان تتخيل مكان معمول بألاف الامتار يحتوى على الاف الافراد .. مش متوقع ان يحصل حاجه غلط خالص؟ على اساس انك عازم ملايكه ؟؟
ولا على اساس انك ضامن مين داخل وايه نواياهم ومافيهومش حد قاصد يعمل حاجه غلط ..؟
نيجى بقى للنقطه الاهم ..واللى كلكم حاطين راسكم فى الرمل مش عاوزين تذكروها
سؤال وبالله عليكم جاوبونى بصراحه
من فيكم مادخلش فرح ايا كان مستواه من اول الفرح الشعبى لحد افراح الفنادق .. ولقى ستات لابسه سوااااريه وبتحط اكل فى اكياس؟؟؟
طب والله العظيم انا كنت فى اكبر فندق فى اسكندريه وشوفت فى الفرح واحده شياكتها تحسسك انها وزيره .. وبتحط الاكل فى كيس ..
احنا شعب بيفضح مابيسترش
احنا شعب لو واحده معزومه عندنا واكلت حاجه .. لازم امى والست دى ماشيه حتى لو كانت غنيه وحالتها ميسوره .. تقوم حطالها الاكل وتقولها عشان العيال انتى اكلتى من غيرهم .. يبقوا اكلوا من اللى اكلتى منه !!!!
طبيعى يا جماعه فى اى حاجه يحصل مشكله فى التنظيم
حفلات النجوم اللى كلها بودى جاردات وبتتعمل فى مكان 50 ولا 60 متر ..
بتحصل فيها بلاوى .. ما بالك دى مائده فيها ناس من كل الاطياف ...
والمشكله .......
لو سيبتهم؟؟ هايعملوا زى ما عملوا ويقولولك انت فاشل والتنظيم وحش
ولو كلمتهم؟؟ يقولك المحافظ عازم اصحابه و افتروا على الغلابه وضربوهم !
انا معرفش المحافظ ولا من مؤيديه .. وكمان مش هاتعاطف معاه من كتر ما اصدقائى الاسكندرانيه شكواهم كتير من ادارته ..لكن الحق حق برضو
المائده دى اتكلم عنها الكل وعن ايجابياتها
ومانشرش السلبيات الا اللى ليهم مزاج يششوفوا سلبيات
بصوا للنص المليان .. وحاسبوا نفسكم الاول
اللى اتخانقوا .. واللى خبوا الاكل فى كراتين ماكانوش قرايب المحافظ
دول كانوا انتــــــــــــــــــــــم
E>E
Eslam Elbahrawy