أزمة امناء الشرطه - استروا عوراتكم قبل المطالبه بزيادة مرتباتكم - رأى شخصى



أزمة امناء الشرطه - استروا عوراتكم قبل المطالبه بزيادة مرتباتكم - رأى شخصى


** مستعد للهجوم .. ولكن… انا رئيس جمهورية نفسي وضميري هو المرجع الاول والاخير **

قبل ما اقفل الفيس بوك الفتره اللي فاتت بكام يوم كده
كتبت بوست دخل فيه امين شرطه كان في الفريندز عندي شتمني وعملي بلوك
انا قلت بكل بساطه

ايوه كل مهنه فيها الحلو والوحش

ايوه في امناء شرطه شهداء ربنا يسكنهم فسيح جناته
ولكن

انا .. المواطن المصري اسلام البحراوي وجهة نظري من سنين و زاد التمسك بيها من فتره قريبه ان الفئه اللي هاتخرب وزارة الداخليه والبلد كلها هي فئة امناء الشرطه

ايوه الرشوه عندهم تسليك سنان

ايوه بيستغلوا نفوذهم وسلطتهم بشكل قذر

ايوه مفيش ظابط ايا كان رتبته يقدر يشتغل ويمشي شغله من غيرهم

ايوه لو حبوا يعقدوا الظابط وحطوه في دماغهم بيقرفوه وبيبوظوا شغله

ايوه لو ليك محضر او بلاغ عاوز تمشيه او توقفه او تلعب فيه لو عندك واسطه ظابط او امين شرطه ..يقولك فكك من الظابط كلم الامين هو اللي في ايده كل حاجه

ايوه امين الشرطه اللي شوفته في واقعه من اسبوعين كنت جوا القسم كان شايل ايفون وتابلت يا جدعان… منين؟؟؟؟

ايوه لما اتسرق تليفون وروحنا القسم الامين اصلا مادخلناش للظابط وقالك يا باشا هو احنا فاضيين ندور علي موبايل .. ولما اتكرمشله 100 جنيه .. نزل معانا في عربيتنا الخاصه وراح جاب الحرامي بنفسه

ايوه بعد ما خد مننا فلوس .. راح لاخت الحرامي وهي واقفه قصاد القسم خد منها فلوس وقالها متخافيش هاظبطه وهاخليكي تدخليله

ايوه هم سبب معظم واغلب بلاوي الداخليه اللي هيجت البلد في السنين اللي فاتت

ايوه هم اللي بيفتروا علي البياعين وبياخدوا اتاوه

ايوه هم اللي في الحتت الشعبيه البسيطه بيستقووا علي خلق الله

ايوه هم اللي بخمسين جنيه يمشي محضر وبخمسين جنيه يوقفه

ايوه هم اللي بيلفوا علي شركات السياحه كل اسبوع ياخدوا ظرف ب 250 جنيه عشان مايفتشوش علي الشركه وتراخيصها

ايوه هما اللي في المطار لما بيلاقوا عيل غلبان رايح ياكل عيش في دوله ما .. يخترعله حاجه اسمها ورقة ضابط اتصال.. ورقه وهميه عشان يدفعوهم 500 او 1000 جنيه ومبررهم ان الواد سايب البلد ورايح يعمل فلوس برا فلازم نقلبه قبل ما يطلع

ايوه هم اللي في اللجان بخمسين جنيه مايكتبش المخالفه وب 100 جنيه يولعلك في الوصل لو عاوز

ايوه هما اللي بيقفوا عي المزلقانات ويستنوا عربيات الخضار بتاعت البياعين الممنوع دخولها جوا المدينه واقسم بالله شوفته كان بياخد من كل عربيه جنيه و 2 جنيه !!!

واخيرا 
ايوه احنا عارفين كل دا وبنقول نسكت ونتكتم عشان خاطر البلد
ايوه احنا عارفين كل دا وبنقول كل مهنه فيها وفيها 
ايوه احنا عارفين كل دا وبنسكت عشان نوقف الداخليه علي رجلها
ايوه احنا عارفين كل دا وبنقول اتغيروا بعد اللي حصل في 25 يناير ..اينعم حصل من خونه وكلاب بس بعض الناس وافقت علي اللي حصل بسبب بعض الحاجات اللي كانت مكرهه الناس في الداخليه واغلبها سببها الامناء

اخيرا
ربنا يرحم كل شهيد فيهم 
ربنا يكرم كل محتررررم فيهم
اما كل مرتشي ومفتري فيهم .. فربنا يخلصنا منه
لكن قبل ما تعمل مظاهرات وتقلبلي حال البلد وعاوز فلوس زياده
بس لنفسك وبطل ترتشي وشوف شغلك ووقتها نبقي نتكلم
مستعد لتقبل اي هجوم
لكني مؤمن بكل حرف كتبته
E.E
Eslam Elbahrawy

** مستعد للهجوم .. ولكن… انا رئيس جمهورية نفسي وضميري هو المرجع الاول والاخير ** قبل ما اقفل الفيس بوك الفتره اللي فا...










Posted by