ناقوس خطر بطاقة سلبيه داخل الحرم - اشخاص يبايعون داعش واخرون ملحدين ينشرون صور لهم داخل الحرم المكى
شىء غريب بدأ يلفت نظرى
** شعائر دينيه **
يعنى ... ( روحانيات )
** الامر منتشر من فتره ولكن السنه دى الامر زاد عن الحد
كام واحد فينا شاف فريندز على بروفايله متصورين اثناء الحج او العمره
كام واحد اخد سيلفى هناك ؟؟
** كنا بنناقش الامر انا وناس من سن والدى راحوا الحج اكتر من مره
وكانوا بيحكولى ان الامر بقى اشبه للناس اليومين دول برحله للمصيف مش للحج وغسل الذنوب
** معناه ايه انى ابقى بطوف و اخد صوره سيلفى والحرم ورايا؟
وكمان انتشرت فكرة الورق المكتوب عليه ايا كان المكتوب وتصور وتبعت
اللى بيحب فلان واللى بيدعى على فلان !
** مش شايفين ان الامر بدأ يفقد المكان روحانيته
وبدأ يفقد الرحله والفعل نفسه قيمته الروحانيه والايمانيه !
** لكن كل دا مجرد مقدمه للبوست اللى هو موضوع الصوره
السنه دى لاول مره بشوف الموضوع دا
كترت جدا الصور اللى من النوع اللى قصاد حضراتكم
دواعش داخل الحرم كاتبين اوراق تمجد فى الدواعش
ناس تكره العرب وكاتبه كلام ضد العرب والمسلمين على ورق ومتصورين داخل الحرم
والاغرب ... ان احد صفحات الملحدين على الفيس بوك
نشرت صوره لحد ملحد .. داخل الحرم وكاتب ورقه باللغه الانجليزيه انه ملحد وانه موجود داخل الحرم .. ولما اتسأل لما انت ملحد ايه مدخلك عند اغلى مكان روحانى يخص المسلمين ..
كان رده صاعق
قال . اننا ( هم كملحدين ) عشان نعيش فى عالم بلا اديان
وجب علينا اننا ندخل عالم كل دين ونشوف اللى جواه عشان نعرف ازاى نهدمه !!
** انا بس عاوز اقولكم ان ناس كتير عماله تفهم الناس الكلام الغلط
بيفسروا الحوادث اللى بتقع ان دا شىء فوق التدبير الالهى
عاوز اقولهم فوقوا واعرفوا انه ما من شىء يحدث الا بإذن الله
اى شىء خير او شر
اى حادث
اى مخطط
مابينجحش الا لان ربنا كاتبله انه ينجح عشان حكمته فى اشياء كتير
فياريت تهتموا بحاجتين وتصدقوهم اوى وتقتنعوا بيهم اوى
اولا مفيش حاجه فوق قدرة ربنا
وحتى نجاح مخطط للعدو بيكون بمشيئة الله لحكمته فى تسيير الكون ولحكمته فى تدبير امور الدنيا
والحاجه التانيه
لازم تعرفوا ان مفيش شىء منتهى ومسلم به من ناحية العدو
يعنى محدش يقول دول عندهم اسلحه وعندهم خطط فهما متفوقين واحنا لا حيله لنا
لا... احنا بإيدنا نوقف كل شىء ونحارب كل شىء
واكبر دليل اللى عمله المصريين فى 30 يونيو لما خربوا مخطط كامل كان بيحاك للعالم كله ولو كان حصل كان دول كتير اتدمرت لكن المصريين قلبوا الطاوله وغيروا الخطه 180 درجه
ولازم تعرفوا ان زى ما فى قوى شر بتخطط .. فى قوى خير والله والله بتشتغل وتنفذ
وزى ما فى تحالفات للشر .. فى تحالفات للخير
فاطمئنوا وخلى عندكم ثقه اولا فى الله وثانيا فى نفسكم
** احنا لما بننشر ونتكلم عن كيمتريل ولا عن اسلحه خفيه مابيكونش الهدف توصيل فكرة اننا منتهين وهم متفوقين .. لاز.الفكره بتكون تحفيذك انك تخلى بالك وتفتح عينك وتدرك الخطوره لان ادراكك لخطورة الامر هو اول خطوه فى محاربتهم .. عشان تبتدى تفكر وتخترع وتقاوم انت كمان
** انا بس حبيت اركز على الظاهره دى
اولا عشان الناس تفوق وتبدأ تفهم ان دى رحله لغسل ذنوبك ووقوفك قصاد اطهر مكان على الارض مش حفله للتصوير
وثانيا عشان برضو نوعى الناس اد ايه احنا مكروهين و اد ايه احنا فى طاقه سلبيه منتشره حوالينا .. وفى ناس جواها شر موجوده داخل الاماكن الروحانيه اللى تخصنا
عشان ناخد بالنا ونقدر حجم الكره الموجه لينا
E>E
Eslam Elbahrawy