سواق التاكسى استاذ جامعه - افضل شرح لحقيقة ما تمر به مصر حاليا يقدمه سائق بدرجة استاذ
** سواق التاكسي .. استاذ جامعه * !!!!
بوست لازم يشوفه كل الناس والله
امبارح كنت رايح فرح واحد صاحبي
المهم ركبت مع سواق تاكسي .. شاب عنده 28 سنه ( سألته عن سنه )
بنتكلم والبلد والحال
فبقوله والله متبهدلين من المصنفات وبتاع
قالي يا باشا معلش صدقني كلنا لازم نعاني
مش هاقولك الحياه جنه بس ايوه في معاناه ولكنها مطلوبه
فبقوله خلي بالك انا السيسي عندي حاجه كبيره .. انا مش من بتوع يسقط حكم العسكر
grin رمز تعبيري
رد قالي والله ولا تفرق .. انا مش بقولك كده لاني بحبه
بس بقولك كده لان محدش عاوز يفهم !
** فقلت اكمل حوار واعرف ايه في دماغه
قولتله وانت عاوز الناس تفهم ايه
قالي…
بص .. انت تعبان من الحياه و دا حقك
بس في جيبك فلوس تركب تاكسي وماسك تاب وماسك موبايلين ربنا يزيدك
تعرف يا باشا جدي و جدك وشهم مكرمش من ايه؟
لسه هرد.. راح قاطع كلامي وقالي ماتقولش من الشقي والتعب
الناس دي وشها مشقق ومكرمش من قلة التغذيه
فاستغربت
قالي بعد 67 .. بدأنا نستعد ل 73
ماكانش حد بيفكر في لبس او اكل او شرب
كله كان همه هدف واحد .. الاستقلال والحريه مهما كان التمن
الناس دي قعدت ست سنين تستعد للحرب وبينزل تموين الاكل يوم بيومه
كان في قله في الاكل والشرب
بس محدش اتكلم .. لان كله كان ملفوف حوالين هدف اسمه الحريه و النصر في الحرب
** باصصله بإستمتاع .. ورغم انه اصغر مني الا انه بيتكلم بلسان راجل عجوز اوي
** سيبته يكمل
قالي يا باشا احنا بنعاني لاننا بقالنا خمس سنين بنوقع في البلد
اللي نزلوا هتفوا بإسم الغلابه كانوا ناس معاهم فلوس
وبعد ما هتفوا .. اللي معاهم فلوس زادوا فلوس اكتر
والغلابه زادوا غلب اكتر !
** عارف يا باشا مشكلتنا ايه
انهم نجحوا مايخلوناش مركزين علي هدف .. زي ايام حرب 73
فبقوله هما مين ؟ .. قالي العدو اللي بيندرج تحته مسميات وناس كتير
خلونا مشغولين .. الاكل والشرب والفلوس والماديات والاعلام وثورة ام احمد و ثورة ابو احمد و اخواني وسلفي ومصري ووطني وخاين
لذلك احنا مش شايفين نتايج اللي بيعمله السيسي لاننا مش متجمعين علي هدف واحد
** وبالنسبه لكلامك عن اكل العيش والمصنفات
بص يا باشا الراجل دا بيفكر صح
فبقوله ازاي دا انا بفتح مشروع عشان ماقولش للدوله توظفني
قالي ايوه ماهو دا الضرر
لانك فتحت مشروع ..والمشاريع في بلدنا اكل او شرب او ملابس
لذلك كلكم فتحتوا مشاريع والمصانع قفلت وماعادش في شغل مصر بتنتجه
فسبب الشده اللي حاصله دي
اولا بيحارب اللي بيستوردوا لانهم بيطلعوا العمله الصعبه برا
وثانيا بقي ..معلش لو انا سيبت كل شاب يفتح محل ويقعد
وجيت قولتله في شغل في مصنع في صحرا ..؟
قولتله هارفض
قالي بس.. الريس عاوز يوجهك هناك بالعافيه
عاوز تفتح محل تحت بيتك استحمل اجراءاته
مش قادر.. روح اشتغل في المصانع ورجعنا تاني لايام ما كنا بننتج
يعني هو بيوجهك للصح بس بشكل قهري لانك مش هاتروح بمزاجك
اما ثالثا .. الريس خلي اول ناس تعاني هما احنا الغلابه
عارف ليه؟ .. عشان لما الغلبان يقبل ويرضي ويسكت ويحب البلد
وقت ما يجي الريس يجي علي المليونير ..مايقدرش يتكلم
ولو اتكلم ..هايبان وقتها ان رجال الاعمال مابيحبوش البلد !!
** ختم كلامه وقالي يا باشا اللي بيعمله السيسي مش هاتشوف نتايجه فوري .. هاتشوفها تدريجي لذلك ممكن ماتحسش بيها.. بس من النهايه الراجل دا قصاده حل من اتنين .. يعيشك في هنا وسعاده ويقولك وانا مالي اقضي الكام سنه واخلع وبعدها نغرق .. او يعمل اللي بيعمله دلوقتي .. يسقيك الدوا المر دلوقتي عشان لما الدنيا تتأزم اكتر تكون انت مستعد من قبلها .. وعشان لما الدنيا تضحك للبلد تحس الفرق ..هو عاوز يرجع الاخلاق والمبادئ اللي ضاعت في اخر كام. سنه… عاوز الشاب يبطل انتخه وينزل يتعب شويه في مصانع بلده عشان وقت الجد نلاقي رجاله جواها مبادئ مغروزه تقدر تدافع عن البلد
** دا كلام شاب .. هو سواق تاكسي
بس والله انا ماسألته عن تعليمه
بس فعلا… اقسم بربي العلي العظيم انا ما سمعت كلام بالهدوء والترتيب دا من فترات طويله… كلام ماقالوش المثقفين والنخبه اللي بيهلوا علينا كل يوم
** انا اتحرجت اقوله عاوز اصورك
لانه فعلا يستحق الناس تعرفه وتحترمه
وسألته عن سنه بس
** الله يحميه ويوسع رزقه .. دي اقل حاجه .. دعوه خير وحب في الله **
E.E
ESLAM ELBAHRAWY
