الشعب المصرى ونظرية الثانويه العامه - بين سوريا وليبيا والعراق و المصريين النيام
الشعب المصرى و نظرية الثانويه العامه
كنت بتكلم مع صديق ليا
قولتله انا بشوف شعبنا دا زى ما كنا ايام ثانوى
مم حسيت ان الفكره ماوصلتش للصديق العزيز
فقلت اوضحها
واحنا فى ثانوى كان الاب والخال والعم
كل ما يقابلوا حد فينا يقولولنا يابنى يا حبيبى
احنا كنا فى نفس سنك وكنا بنلعب ونقول مش مهم ومش هانذاكر
والاخر ندمنا كتير اوى
اسمع كلامى .. ماتعملش زيى انا مش عاوزك تندم
اتعب بس السنه ولا السنتين دول وبعد كده هاتدخل الكليه وتعيش حياتك
بس هى مرحلة الثانويه العامه دى اللى بتحدد حياة الانسان
ماكانش بيكون فى رد فعل مننا وقتها
الا اننا بننفض
بننفخ ونقول هو كل واحد يجي يقولك اسمع منى
الناس دى مفكره كل الناس زيهم !
لحد ما يجي اليوم الموعود
واللى مابيذاكرش فعلا بيندم باقى حياته لانه بيكون فاشل
تدور الايام .. اكون انا كبرت وبقى ليا حياتى
ويجي اخويا الصغير يكون فى ثانويه عامه
وسبحان الله .. الاقى نفسى بنصحه واقوله نفس الكلام اللى كان بيتقالى
وهو بيعمل نفس رد الفعل اللى انا عملته زمان
الفكره او المراد توصيله هنا
ان الانسان مهما تم ايعاظه او نصحه .. مش بيقتنع الا لما يجرررررب
طول ما النار بعيد عنه .. لو قعدت تحكيله عشر سنين عن وجع النار وحرقها والله ولا هايقدر يحس لانه ماجربش
انا طبقت المثل دا علينا كشعب
الناس كلها بتنصح فينا
الليبي تلاقيه بيكلمك ويقولك يا اخى احمد ربنا ان عند حكومه بتحكمك
دا احنا عندنا كل شارع له حكومته
السورى يقولك احمد ربنا يا اخى ان عندك جيش
واحمد ربنا ان اختك و امك نايمين فى حضنك ومطمئن عليهم
احنا بناتنا بتغتصب ورجالتنا بيتم قتلهم
تلاقى العراقى يقولك يا اخى احمد ربك على الامن والامان
دا احنا كل يوم تفجيرات بتوقع مننا بالعشرات
وكل واحد نايم وحاسس ان اى لحظه الباب ينفتح عليه ويتقتل
ومع ذلك .. ومع كل دااااااااااا
احنا مش بنقتنع اننا فى نعمه مهما ساء الامر
اكيد مش مقبول اننا نرضى بالسىء
لكن الفكره اننا نحاول نحسنه بدون ما نوقع بلدنا
وانا احساسى الشخصي
ان بعد خمس سنوات واكتر على نكسة الخراب
وبعد رؤيتنا لكل الخراب اللى حصل حوالينا
وبعد ردود افعالنا اللى بتخرب البلد سواء بسبب الجهل مننا او الخيانه
اصبح عندى اعتقاد يزداد قوه ان احنا مش هانحس الا بالنار الا لما تكوينا وتلسعنا
لكن الخوف كله ان لا قدر الله لو النار دى جت عندنا
وقتها مانلحقش نخمدها .. وتفضل تحرقنا زى ما بتحرق كل اللى حوالينا
ربنا يستر
ويحمينا ويحمى بلدنا
بس وجب التذكير لان احنا لما بنرتاح .. بننسى !!
E.E
Eslam Elbahrawy
