الاعلاميه رانيا بدوى تسأل المهاجمين لخالد ابو النجا بعد مشاركته فى مسلسل يضم صهاينه ماذا فعلتم انتم فى مواجهة اسرائيل؟ - ونحن نجيب
هو احنا كنا عملنا ايه فى مواجهة اسرائيل !
** الاستاذه الاعلاميه رانيا بدوى مؤخرا فى احدي حلقات برنامجها القاهره اليوم
علقت على الناس اللى بتهاجم خالد ابو النجا و بسمه لمشاركتهم فى مسلسل بيمثل فيه صهاينه !
** الاستاذه بتقول :
العلاقات الخارجية تستلزم التعامل مع إسرائيل بحدود معينة"، وأنهت حديثها قائلة: "إلى من يتحدث ويعترض على التطبيع مع إسرائيل، ماذا فعلت لكي تنافس إسرائيل؟".
** انا بس عاوز ارد على الاستاذه رانيا
1- انتى بتسألينى انا كشخص؟ انا يكفينى كشخص انى بكره الصهاينه وبلعنهم فى كل مكان وعمرى ما احط ايدى فى ايد حد منهم
2- انا كشخص ومواطن عادى .. يكفينى انى اتربيت ان الصهيونى بينى وبينه دم وانى اتربيت ان العداوه بيني وبينهم ليوم الدين وان ديني بيقول كده
3- انا كشخص ومواطن عادى .. يكفينى انى افتكر كنت طالب لسه وخرجت مع زمايلى يوم استشهاد محمد الدره وكنا بنهتف ضد اليهود وبنقول بالروح بالدم نفديكى يا فلسطين
4- انا كشخص .. يكفينى انى مابعملش زيكم كإعلاميين .. زى ما عمل زميلكم المحبب اليكم باسم يوسف وبنشر خريطة للعالم فى برنامجي والخريطه تحتوى على كلمة اسرائيل بدلا من فلسطين
5- يا استاذه رانيا ايوه فى بيننا معاهدات ولكنها معاهدات سياسيه .. وزى ما بتقولى بتقتضى اننا نتعامل معاهم على مستوى خارجى .. ايوه مستوى سياسي خارجى
انما مش نروح نعمل افلام مشتركه بقى .. وشويه شويه نجيب فريق غنائى صهيونى يغنى عندنا فى ساقية الصاوى .. وبعدين احنا نبعت فرقة اولاد الشوارع او نبعت باسم يوسف لتل ابيب يعملوا عروض هناك .. !!
6- ثم ان يا استاذه .. بالنسبه لحضراتكم المبادى بتتجزأ ولا ثابته
يعنى مبارك فاسد لانه راح يجيب مبيدات مسرطنه من اسرائيل !
( هو دا مش ممكن يتشاف انه تطبيع برضو على حسب رؤيتكم )
وتوفيق عكاشه خاين لانه قعد مع سفير دوله بيننا وبينها دم
( الله .. هو دا مش ممكن يتشاف انه تطبيع برضو على حسب رؤيتكم )
السيسي بيقفل الانفاق على غزه عشان يمنع حماس من مهاجمة اسرائيل فيبقى السيسي بيأمن اسرائيل
( الله .. هو دا مش ممكن يتشاف انه تطبيع برضو حسب رؤيتكم ) ..؟
- مع العلم ان مبارك ماجابش مبيدات مسرطنه .. والسيسي مش بيأمن الا حدود مصر .... وتوفيق عكاشه اخطأ فيما فعله
ولا هوا يا فندم وقت ما تتعمل الحاجه من حد مش على المزاج ..تبقى خيانه
ووقت ما تتعمل الحاجه من اى حد ضد الدوله المصريه وضد الجيش المصرى و يكون كمان الحد دا من براثن وبقايا اشلاء نكسة 25 يناير .. فوقتها يبقى تطبيع عادى وواجب انه يحصل !!
7- الغريب ان فى نفس حلقات برنامجكم الموقر
كنتم ( رانيا بدوى وعمرو اديب ) تتحدثون دائما عن قطر بحرقه شديده .. وكم كان يظهر على وجوهكم علامات السرور اذا ما وقع تميم ابن موزه فى موقف محرج على يد مسئول مصرى .. او عندما رمى سامح شكرى ميكروفون الجزيره ..
وكانت علامات السرور على وجوهكم تفسرونها انها بسبب ان قطر دوله تعبث بأمن مصر .. و تمول ارهاب الاخوان .. ومحمد مرسى كان جاسوسا لها
الله ....؟
يعنى نكره قطر اللى بتمول الاخوان وارهابهم
بس بيس قشطه عادى نمثل مع اسرائيليين كانوا محتلين بلدنا وقتلوا شبابنا
ومازالوا محتلين القدس الشريف !
والنبى مبدأ حلو برضو !!!!!!
** المشكله التى ستظل دائمه
انكم تعاملون كل المصريين على انهم يملكون ذاكرة السمك
ولا تدركون انه مازال هناك مصريون يملكون ذاكره تشبه الفلاش ميمورى
لا تفقد الارشيف الخاص بكم حتى لو تم عمل فورمات للفلاش
لاننا بنجيب برامج ترجع اللى اتحذف
سلامو عليكو
E.E
Eslam Elbahrawy
