بين خالد ابو النجا و اسلام الشهابى - واقعة عدم مصافحة اللاعب الصهيونى - افعل الشيء كله او لا تفعله
بين بسمه وخالد ابو النجا واسلام الشهابى **
- كلمتين .. يخصونى انا كشخص له وجهة نظر متواضعه ولن تغير من الامر شىء
لكن هاقولهم والامر لله
- من كام يوم كنا نشرنا واتكلمنا عن مشاركة بسمه وخالد ابو النجا فى مسلسل امريكى بيضم صهاينه وكمان بيتصور فى تل ابيب والجميع استنكر الامر .. وقولنا انه ماينفعش
- ثم بالامس .. كانت مباراه فى لعبة الچودو بين بطل مصر اسلام الشهابي والصهيوني ساسون !
- طول عمرنا بنعرف ان فى امور ماينفعش فيها الوسط
اما ابيض او اسود .. الرمادى ممنوع
- قبل المباراه .. افتح صفحات الكوميكس وصفحات الرياضه اللى اغلب اصحابها شباب .. كله عمال يقول لاسلام يلا يا شيخنا قطعه.. يلا يا شيخنا اسلخه .. منتظريك يا شيخنا تخلى اللحم فى حته والعضم فى حته .. وتم قبول ان اسلام يلعب مع الصهيوني ويقطعه ( بيقولوا يا شيخنا لان اسلام مربى دقنه )
- ثم .. اتلعب الماتش .. اسلام خسر ...
وفى نهاية الماتش .. الصهيونى رايح يسلم عليه .. اسلام ابتعد بإيده وبجسمه ورفض يصافحه بحكم انه صهيونى يعنى !!
- انا هنا عاوز افهم حاجه
الاول بس خلينا نقول ان قبل المباراه دى بيومين ...
كان فى مباراه بين بطله من السعوديه ومنافسه من اسرائيل
والبطله السعوديه انسحبت ورفضت تلعب المباراه
- السؤال هنا بقى لاسلام ...
انت لو مش عاوز تسلم عليه لانه صهيونى ابن كلب محتل وبيننا وبينهم دم
ليه لعبت المباراه ؟؟
ليه مانسحبتش ؟؟
اصل يا اسلام الفكره مش فى السلام ..
يعنى هو مثلا توفيق عكاشه لو كان قعد مع السفير الاسرائيلي بس ماسلمش عليه .. كنا نقول عكاشه صح؟
لو كان بسمه وخالد ابو النجا مثلوا فى مسلسل فيه صهاينه بس ماسلموش عليهم ؟ يبقوا كده صح ؟
- اما الانسحاب .. او انك تلعب يا فندم وتكمل للاخر
بالمناسبه مش بقولك انك كان لازم تسلم وتحضنه .. انا لو عليا عاوزك تقتله
بس انا بتكلم عن المبدأ ..
انت راجل وقفت معاه على ملعب واحد
ولمسته ونطيت فوقه و هو كسبك وفى مباراه حصلت
واتحط علم مصر وتحته علم اسرائيل على الشاشه ان دى مباراه
هل هاتيجي على السلام ..؟ عشان نقول الولد مارضاش يسلم ؟؟
- انا مش بجلدك .. والله اعلم بنواياك
بس انا مابحبش اللف والدوران فى الامور دى
انت شايفه ابن كلب محتل .. يبقى انسحب
وافقت تلعب .. يبقى ماتلعبش وتلمسه وتضربوا بعض والاخر تقولى السلام كخه!
ياريتك ما لعبت .. كان افضل انك ماتلعبش
- النقطه التانيه بقى
اللى انت عملته خلى كلاب كتير يرددوا الكلام التالى
ان اسلام تم الضغط عليه سياسياااااااااااا عشان يلعب المباراه
والدليل انه لعب غصب عنه بس لما جه يسلم .. مارضيش يسلم
وابتدوا يعملوا حوارات وخيالات من اللى المغيبين بيصدقوها
ان انت كنت هاتنسحب بس الامر سياسي ولان السيسي الانقلابى بيحب اسرائيل ..نظامه هو اللى اجبرك تشارك فى المباراه ...!!!
ايوه الكلام دا اتقال .. يبقى كان لازمته ايه
- النقطه التالته
امبارح على قناة السى بى سى .. فى برنامج رياضى اسمه السوبر
بيقدمه شاب اسمه ابراهيم فايق
كان بيتكلم فى الموضوع وبيقولك بلاش تدبحوا الولد والكلام دا
وقال ايه ابراهيم ؟؟؟
قالك اصل دى رياضه يا جماعه ابعدوها عن السياسه .........؟
انا بس عاوز اقول للاستاذ ابراهيم مفيش حاجه اسمها كده
امريكا وايران ماكانوش بيقابلوا بعض بسبب الخلاف السياسي
ولما لعبوا فى كاس العالم 1998 لكرة القدم مع بعض .. كان حديث العالم
خد عندك تانى
فى اوليمبياد ريو اللى شغاله حاليا
لاعبه من كوريا الشماليه اخدت صوره سيلفى مع لاعبه من كوريا الجنوبيه
والمعروف ان الكوريتين بينهم مطارق الحداد
وكانت النتيجه هياج شعبى وردود فعل واسعه بسبب الصوره دى
وبكلام حضرتك دا بقى نعتذر لخالد ابو النجا وبسمه ونقولهم معلش انتوا صح
اصل الفن مالوش دعوه بالسياسه بقى !!
مفيش حاجه اسمها كده
يا اما نلعب ونبقى خلاص وافقنا على الاعتراف بيهم واللعب معاهم
يا اما ننسحب !!!
-- بالاضافه للوقائع السابقه
فى نفس الاوليمبياد برضو بعد انسحاب لاعبة السعوديه امام لاعبه اسرائيليه
كان فى واقعه تانيه هزت العالم برضو
يوم افتتاح الاوليمبياد .. الفرق كان بيتم نقلها فى اتوبيسات
فوجىء المنتخب اللبنانى ان الاتوبيس بتاعه هايشاركه فيه لاعبى اسرائيل
مدير بعثة لبنان بلغ سائق الاتوبيس يقفل الباب قبل لاعبي اسرائيل ما يدخلوا
ولما رفض السائق
نزل لاعبى لبنان من الاتوبيس .. وفعلا تم تخصيص اتوبيس خاص لهم بعيد عن الاسرائيليين
وبرضو كان واقعه حرقت دم الاسرائيليين ووجهت رساله للعالم
- ياريت دايما نكون واضحين فى افعالنا
ومانسيبش دايما باب مفتوح للقيل والقال
ويبقى عندنا مبدأ ...
نلعب او مانلعبش .. ننسحب او لا
لعبنا يبقى مانقولش لعبنا واحنا متضايقين .. لان كان فى ايدك تنسحب
ومستحيل كان حد من مصر هايلومك بالعكس شعبنا العاطفى كان هايحولك لبطل شعبى
-- انا قلت كل اللى فات دا ليه .. لانك لعبت واتغلبت ولانك مارضيتش تسلم ..
خرج المتحدث بإسم رئيس وزراء اسرائيل بيقول :
"إن رفض الشهابي مصافحة ساسون يشكل انتهاكا صارخًا للأعراف الأولمبية وللروح الرياضية".
لا .. انا كان عندى تنسحب احسن وبرضو كان هايطلع الصهيونى النجس يقول نفس الكلمتين ووقتها كان هايبقى شرف اننا انسحبنا و حرقنا دمهم وشوهنا صورتهم قصاد العالم
- انا بس حبيت اوضح اللى جه فى بالى وانا بتفرج على الماتش
وبالمناسبه .. كل العيال اللى ماسكين الصفحات على الفيس وانستجرام
اللى قبل الماتش قالولك قطعه يا شيخ اسلام
هما نفسهم اللى اتريأوا عليك وعلى نتيجة المباراه !!!
E.E
Eslam Elbahrawy
