كارثة رشيد 1x5 - بين الدوله والاعلام والضحايا والاخوان ومجاذيب مبارك - الجميع شاركوا فيها
** مركب رشيد 1X5 !!
- وجهة نظر شخصيه بس هاحاول اجمع فيها كل النقاط
حادث مركب رشيد و جوانبه الخمسه
1- الدوله
2- الضحايا
3- الاعلام
4- الاخوان
5- مجاذيب مبارك وشفيق !
1- اولا .. الدوله
انا شايف ان الدوله عليها عامل كبير فى الحادث دا
مش هاقول لعدم توفير الشغل وكثرة البطاله لان انا فاهم كويس ان مفيش دوله فى الدنيا مافيهاش بطاله حتى الدول المتقدمه اللى حضراتكم بتقارنونا بيها .. وكمان احنا مش دوله منتجه وشعبها شغال احنا بطبعنا دوله ناميه وهاتفضل ناميه
لكن ... مركب فى عرض البحر وفيه حوالى 400 شخص هنا وجب عليا اسأل فين خفر السواحل وفين الناس اللى بتراقب المراكب الموجوده فى المياه ؟
اكيد دا دور الدوله والحكومه بالاضافه الى كارثه حقيقيه كلنا نعرفها وهى ان تجار الموت اللى بيسهلوا الهجره معروفين بالاسماء والعناوين ومشهورين ومحدش بيقدر يقربلهم لانهم مافيا قويه جدا !
ومعروف تنزل القريه الفلانيه يقولك اه الحج فلان دا مسئول سفر الشباب فى القريه لدولة كوريا الجنوبيه بياخد على الراس 60 الف .. والحج فلان مسئول عن سفر الشباب لايطاليا بتدفع 150 لو تأشيره سليمه و 100 الف لو مضروبه و 70 الف لو هاتسافر بالبحر متهرب ! ...
معروفين والله لينا حتى كشباب شغالين فى مجال السياحه والسفر
--------------------------
2- ثانيا .. الضحايا
قبل كل حاجه لازم نقول ربنا يرحم الناس جميعها يارب
لكن ازاى بترمى بنفسك فى التهلكه ؟
اه لقمة العيش صعبة وحالة البلد فعلا فيها اماكن وفيها ناس مش لاقيه تاكل
لكن العيشه الصعبه ولا الموت ...؟
انت مش فى بلد فيها حرب ولا متقسمه ولا كل يوم بينزل عليك صاروخ زى ما بيحصل فى ليبيا ولا سوريا عشان تكون الهجره والموت هى اخر قراراتك !
بالاضافه الى انه انا بتعجب منكم بجد
الواحد فى المركب غير الشرعيه دى بيدفع احيانا مبالغ تصل ل 100 الف جنيه
لو معاك ال 100 الف ماتقدرش تمشى بيهم حالك فى البلد
مشروع صغير اضمن مليون مره من انك تموت نفسك
للاسف يا جماعه .. كلامى الجاى مش كل الناس هاتفهمه
لكن اللى من قريه هايفهم .. لكن فى ناس برا القرى مش هاتستوعبه
انا شغلى كله فى مجال السياحه وليا علاقات بالناس اللى جوا القرى
اللى بنسميهم سماسره عشان يجيب ناس الشركه عندى لو عاوزين يسافروا الخليج او ما شابه
الناس اللى من القرى عارفين ان حلم اهل القريه دايما حتى لو معاهم ملايين هو السفر لاوروبا .. الشاب هناك بيطلع فرنسا او ايطاليا يرجع بعد سنتين شارى حتت الارض وبنى البيت الكام دور والعربيه .. لذلك الاهالى هناك بتدفع فلوس كتير وهما ميسورين الحال عشان يسفروا عيالهم .. وفى اهالى بتطلع عيالها بعد الاعداديه عشان تسافر
انزلوا محافظه زى الغربيه عندنا
هاتعرفوا ان قرية كذا معروف ان كل ولادها فى فرنسا
قرية كذا معروف ان كل ولادها فى ايطاليا
انا مره قعدت مع تاجر فاكهه من بلد اسمها السنطه
اقسم بالله مستعد يدفع لحد 180 الف جنيه عشان يسفر ابنه لايطاليا
وقد كان بالفعل و دفع والولد سافر بس بجواز سفر وتأشيره مش متهرب
رغم ان الراجل مليونيييير ومش محتاجين فلوس !
اوقات كان يجيلنا ناس تطلب اى طرق غير شرعيه عشان تطلع استراليا او اى مكان فى اوروبا و مستعدين يحطوا على الترابيزه مبالغ تتخطى ال 200 الف للفرد الواحد !!
ايوه ماتتعجبش من اللى بقوله
ابحث عن ضحايا مركب رشيد هتلاقى فيهم الغلبان اه
بس هتلاقى اكتر اللى عنده فدادين وراح باعها عشان يسافر !!
فى قرى فى مصر ماتعرفش تعليم ولا شغل ولا اى حاجه
مايعرفوش الا ان العيل يوصل 15 سنه يهاجر على طووووول
الله يرحم الجميع
لكن ارجوكم ماترموش بنفسكم فى التهلكه بحجة لقة العيش
لان لو كلنا فكرنا زيكم كده والله العظيم اكتر من نص مصر هايكون فى عرض البحر من بكره !!
--------------------------
ثالثا : الاعلام ....
للاسف قذارة الاعلام مستمره للصيد فى الماء العكر على الجانبين
سواء الصيد فى الماء العكر ضد الدوله
او الصيد فى الماء العكر للتطبيل للدوله
مما يثير سخط الناس على الجانبين
اللى ضد الدوله قالك الحق الدوله بتقتل ولادها
السيسي رايح الامم المتحده يتكلم عن الهجره غير الشرعيه وبلده بيموت ناس فيها
وبدأت قنوات تجيب ناس تقول ان الجيش وقوات خفر السواحل بتسهل عبور الناس مقابل الفلوس والدوله بتساهم فى موتهم
طبعا على رأسهم وائل الابراشي
اللى مع الدوله دا بقى للاسف كالعاده .. الدبه اللى بتقتل صاحبها
يعنى احنا بنقول للناس ان الهجره غير الشرعيه غلط
وان غرقهم وموتهم ( الله يرحمهم ) نتيجة عمل غير شرعى دا مسئوليتهم
وان حتى لو ظروف البلد وحشه وهى بالفعل وحشه دا مش مبرر يقتلوا نفسهم
لكن سطلع واحد يقولك ايوه انتوا بتستعبطوا لانكم بتدلعوا
انتوا بترفضوا وظايف القوى العامله ووظايف الدوله ورجال الاعمال وبتفضلوا الهجره
ياعم اتخرس واسكت بقى .. ياعم خنقتنا وهاتكرهنا فى ام الدوله
وظايف دوله مين ورجال اعمال مين ؟
وظايف دوله ايه واحنا كشباب بنحفى عشان نلاقى وظيفه فى محل ملابس
يا راجل دا فى ناس متعينه تعيين مؤقت ب 400 جنيه وصابرين يا عينى على امل انهم يتثبتوا .. يا راجل دا فى بنات متغربه عن محافظاتها مقابل وظايف الحكومه اللى بألف جنيه .. يا راجل اسسسسسسسسسسسسسسسسسسسكت
ورجال اعمال مين ..؟
رجال الاعمال اللى بيطلبوا شغل فى مصنعهم او شركتهم 12 ساعه كل يوم مقابل 800 جنيه فى الشهر .. فى الوقت اللى بقى تمن الجزمه فيه عند التوحيد والنور ب 150 جنيه !!
لو عاوز تبين للناس خطأها .. بينه بموضوعيه
انما ابقى مجروح بسكينه حتى لو جاااارح نفسي بيها
وتيجى تدوس بجزمتك على الجرح
ومفكر انك كده مع البلد والنظام والشعب يحبك
بالعكس انت بتزود غضب الناس على البلد والنظام
اكيد مقدرش اقول اسم الاعلامى المميز اللى قال كده
عشان الاستاذ احمد موسى بيزعل !!
--------------------------
رابعا : الاخوان
رغم كل الافلام اللى حاصله دى
الا انكم هاتفضلوا بقر .. مجرد بنى ادمين براس كلب
فيديوهات مفبركه مع ناس يقولك ايوه بنعترف اننا بنسهل الهجره الشرعيه والجيش والحكومه بيساعدونا !... فيديوهات يقولك الشباب اهو وهو بيغرق وبيموت ويتضح انها فيديوهات لحالات غرق لسوريين ولاجئين اخرين ولم تحدث فى مصر .. والغريب فى كل دا ان الفيديوهات دى مش بتتذاع الا على صفحاتهم وقنواتهم :D
ارحموا نفسكم دا انتوا حتى كنتم شمتانين فى الناس اللى ماتت
يا مسلمين يا بتوع كتاب ربنا يا بتوع دولة الخلافه وقال الله وقال الرسول
فرحتوا فى الناس اللى ماتت وقولتوا احسن عشان تبقوا تساندوا السيسي !!
--------------------------
خامسا ... مجاذيب مبارك وشفيق
كالعاده لازم مع كل حادث ارهابى يحصل او اى كارثه
يطلع المجاذيب ( بعض وقله ممن يقولون انهم يحبون مبارك او شفيق )
ويبتدى يقولك شوفت.. السيسي عامل فيها ايه .. دا لو مبارك ولا شفيق بقى !
وواحد تانى قالك شوفت العباره السلام غرقت اتهموا مبارك انما هنا محدش كلم السيسي
والتالت يقولك دا ذنب مبارك اللى محبوس وشفيق اللى متغرب بموافقة السيسي ورغبته عشان كده ربنا بيعاقبه !
للمره المليووووووووووووووووون
اللى يفضل شخص على وطن مستحيل يبقى مصرى
للمره المليون
لو مبارك وشفيق شافوا شماتتكم دى مستحيل يوافقوا عليها
للمره المليون
انتوا كده بتساعدوا ان ناس اكتر تكره مبارك وشفيق وبتشقوا الصف بالفعل
العباره السلام كان لازم يتحمل مشكلتها النظام فى وقتها لان العامل الاكبر عنده .. لان دا حادث لمركب له اوراق شرعيه وبالتالى تابع لاشراف الدوله وبالتالى صيانته وفحصه تابعه للدوله واى خلل هايكون معناه ان الدوله لم تفحص جيدا او وافقت على خروج العباره وهى غير صالحه للملاحه ( رغم اننا عارفين ان الحادث قد يكون بفعل فاعل ) .. لذلك وقتها النظام شال الشيله
فى حادث رشيد .. ايوه النظام برضو بيشيل
لكن الجزء الاقل
لان دى حاجه غير شرعيه
والمعروف ان فى المخدرات حتى او اى شىء مخالف
مهما كان التشديد بيمر حاجات ومش بتتمسك كل حاجه
لكن الدوله مسئوله برضو قصادنا اننا نفهم ازاى 400 واحد فى مركب ومحدش شافهم !!
--------------------------
انا اسف على الاطاله
انا انهيت كلامى اللى جايز هايزعل كل الاطراف
وان كان طرف المجاذيب والاخوان لا يهمنى زعلهم من عدمه
ولكن فى الظروف الصعبه لازم نواجه
اتعلمنا كده فى الكام سنه اللى فاتوا
وكمان الريس اللى بنحبه وبتحبوه علمنا كده لما مسك الحكم
وقالك هاصارحكم واشارككم بكل حاجه
المواجهه افضل من دفن الرؤوس فى الرمال
وسلامو عليكو
E.E
ESlam Elbahrawy
