جمال مبارك رئيسا لمصر - شعب الغلابه اللى اشترى الترماى - احذر يلعبون بعقلك ويروجون الشائعات من خلالك
** جمال مبارك رئيسا - احنا الشعب اللى اشترى العتبه الخضرا و استأجر الترماااى **
- صاحى مصدع ونفسيتى مش تمام
مالحقتش اتغدى و هاتأخر على الشغل
مش قادر امشي ... يلا الامر لله اركب تاكسي بخمسه جنيه !
- تاكس .. شارع النادى قصاد مديرية الامن
- اتفضل يا باشا
- ابتسامه بلهاء تمر فوق شفاه سائق التاكسي تلحقها عبارة :
هو لازم يعنى قصاد المديريه .. ربنا يكفينا شرها .. مصحوبه بضحكه من ضحكات هانى رمزى فى فيلم غبى منه فيه
- كان الرد : شرها ليه يا اسطى .. هو انت اتاخدت ظلم فيها قبل كده ولا حاجه؟
- لا يا باشا بس انت عارف ابعد عن الشر وغنيله !!
*** يسير التاكسى ببطىء وسط زحام شوارع طنطا
وبعد دقائق من الصمت يتحدث السائق مره اخرى
- والله يا باشا الدنيا بقت معجنه .. هانقول ايه بقى ربنا يولى من يصلح ولو ان شكلها كده مش هايكون من يصلح خالص
- يولى من يصلح ازاى يا ريس ؟؟ ما البلد فيها رئيس دلوقتى
يولى من يصلح دى بتتقال وقت الانتخابات
- اه يا باشا .. ماهى باينه من دلوقتى اهى
انت ماشوفتش جمال مبارك ؟
- لا والله ياسطى ولا عمرى قابلته .. مشاغل الحياه بقى !!
- لا يا باشا انا اقصد ماشوفتش اللى عامله
دا نازل الانتخابات الجايه يا باشا ومولع الدنيا
- ممم لحظات من الصمت مرت على ذهني حتى استطيع استيعاب التلوث السمعى الذى مر على اذني .. ثم : نازل فين يا حج عشان بس نعرف ؟
- نازل يا باشا الانتخابات الجايه .. دا لحد دلوقتى فى الكام يوم اللى فاتوا بيقولك جمع حوالى 500 الف صوت
- توقف ذلك الصوت فى حلقى ومنعته بشده ( صوت حسيييين )
وحاولت الرد بالهدوء المتعارف عنى :
ايوه ياسطى بس هايجمع اصوات ازاى يعنى ؟ بدأ يلم بطايق الناس ؟
انت جايب الكلام دا منين ؟ وبتقولى بيقولك ؟ هو مين اللى بيقولى؟
لسه فاضل سنتين فى فترة السيسي .. يعنى حتى لو جمال مبارك نازل هاينزل دلوقتى يعمل ايه !!! هو فى حد بيلم اصوات انتخابات من غير انتخابات ؟!
- لحظات من الهدوء مصحوبه بنظرات بلهاء من السائق الذي شعر ان معتز مطر قد غرغر به و اعطاه معلومات لا يمشى وراءها سوى المغيبين مشاهدى قناة الشرق ..
ثم اكمل :
يا باشا المهم انه بيقولك نازل والواحد مش عارف يعمل ايه لو كسبها
- هنا انطلق المارد الغاضب بداخلى ولم احاول السيطره تلك المره فأفسحت له المجال للانطلاق بقوة السهم حتى يخترق غباء هذا السائق الذي لا اجد العيب فى مهنته او حتى مستوى تعليمه لان ما يردده قد يعلم اى شخص أمى غير متعلم انه خاطىء ولكن لاختراق عقله الجاهل الذي يستمع للجهل ويصدقه دون عناء التفكير فيه
وكان الرد كالتالى :
والله ياسطى جمال مبارك .. ابراهيم مبارك .. فتحى مبارك - حسنى مبارك نفسه
كل واحد حر
بعد سنتين فى انتخبات رئاسيه فى مصر
اى مواطن يستوفى الشروط من حقه يترشح
السيسي وجمال وحسني وعبد الناصر الله يرحمه لو مستوفيين الشروط ينزلوا
السيسي مافرضش نفسه واحنا جيبناه بمزاجنا واللى مش عاوزه ينزل يشيله او فى الانتخابات يجيب غيره ويصوت لغيره
وبعدين يعنى ايه تعمل ايه؟ انت راجل لك صوت انتخابى
انزل .. حط صوتك .. واحترم النتيجه
هو يعنى لما ولاد الكلب جابولنا الجاسوس واحنا ماكناش انتخبناه
قولنا خلاص وسكتنا رغم ان الحسره كانت بتقطع فينا
احنا شعب مابيعرفش يقرر مصيره وبيسيب غيره يقررله
وبعدين ماتقلقش اللى شافه جمال مبارك وابوه يخليهم مايفكروش يفتحوا محل كشرى فى البلد دى اصلا مش ينزلوا انتخابات !
احنا شعب ربنا بيعاقبنا بقالنا 5 سنين
احنا شعب لو بيفهم كان فهم ان الثوره كانت تكون من تحت مش على الكرسي
كنا فهمنا اننا ماينفعش نمسك الراس و نسيب الديل زى ما بيقولوا
تقدر تقولى ياسطى ريس واحد بيحكم 90 مليون عندهم هواية النصب والاستغلال والسرقه احيانا .. هايقدر يشوف دول كلهم ازاى؟
- مازال السائق غارق فى دوامة طلقاتى التى اندفعت فى وجهه
فوجدتها فرصه لاستكمال كلماتى
- ياسطى ازاى الريس ايا كان حسنى ولا السيسي ولا اى رئيس جاى محترف من برا .. هايقدر يراقب كل الناس .. اذا كان اللى بيراقبوا نفسهم حراميه ..
الشعب نفسه هو اللى بينصب على بعضه
سواق التاكسي مش بينصب فى الاجره بعد اشاعة ان البنزين هايغلى
كشك السجاير مش بيبيعها غاليه بحجة الضريبه الجديده وبيبيعها اغلى من سعر الضريبه
يا راجل دا مفتش الضرايب نفسه بيدخل المكان اول مره شادد حيله
وبعدها بيتحطله الشاي والعصير والظرف اللى فيه النفحه
بيطلع من المكان مابيرجعش تانى
يبقى الثوره كانت لازم تقوم على رئيس وكرسي؟
ولا على شعب انعدم ضميره واخلاقه
على شعب الشباب فيه بيسقط البنطلون والبنات فيه بتلبس بناطيل وبديهات مخرمه من الفخد والصدر !
والاخر نرجع نقول كل المؤسسات الجيش بيحكمها
ياعم هو احنا لقينا مدنى محترم وقولنا لا
وزير زراعه يطلع حرامى ووزير تموين مابيقدرش يتصدى للفساد وماعندوش القوه
طبيعى بقى لازم نشوف مين اللى عنده الحزم اللازم
- التقطت السائق انفاسه وقالى وهو لازم الجيش يحل كل حاجه
- عصبنى مره اخرى .. فقررت الهجوم مره اخرى .. سلاحى لا تنفذ طلقاته :)
ياسطى انا عاوز اسأل سيادتك سؤال
هو الجيش مش من ضمن المؤسسات جوا مصر ولا جيش من هولندا؟
هو الاكل والشرب مش امن قومى والجيش المفروض بيحمى الامن القومى ؟؟
ياعم بلاش كل داااااااااا
انت قاعد عاطل ومش لاقى شغل.. والحكومه وقطاع الاعمال والقوى العامله مافيهاش شغل تقدمهولك .. والجيش جه قالك انا عندى لك وظيفه
هاتروح تقول فضل ونعمه وتشتغل ولا تقول هو حتى الجيش هايوفرلى وظيفه !!
انت مش لاقى تاكل وبتموت من الجوع
ووزارة التموين راس مالها او فلوسها مش مكفيه انها تأكلك
و جه الجيش قالك خد وجبه
هاتقول الحمد لله ان مؤسسه اخرى فى بلدى بتشيل مؤسسة التموين
ولا تقول هو الجيش كمان هايأكلنا ويشربنا
اما امر غريب بجد
انتوا ليه مستغربين من مواقف الجيش
الجيش بيعمل كده لانه المؤسسه الوحيده اللى واقفه على رجلها
ولانه المؤسسه الوحيده اللى عندها فلوس تقدر تسد وقت الازمات
*** تقريبا .. كنا على ناصية شارع النادى
وخلاص قربت انزل
وحسيت ان الراجل هايجيله جلطه
فقررت احن عليه واسكت
وقبل ما انزل ...
قولتله ماتصدقش اللى بيتقال فى التلفزيونات
ماتصدقش الا اللى تشوفه بعينك
ماتخليش حد يقنعك ان فى واحد بيجمع اصوات واصلا مفيش انتخابات
ماتخليش حد يقنعك ان الجيش سحب لبن الاطفال من السوق واصلا الجيش بعت جاب اللبن من برا
ماتخليش حد يقنعك ان الجيش بيستولى على كل مؤسسات الدوله لان لو كنا شوفنا واحد مدنى محترم يعتمد عليه كنا وقتها قولنا للجيش اقف عندك وخد الراجل بتاعنا المدنى دا .. الراجل دا كفاءه !!
--- والله يا باشا عندك حق
محدش فاهم حاجه فى البلد دى واحنا عاوزين الستر بس ونربى عيالنا
( كانت دى اخر كلمات السائق مغسول العقل قبل ان انزل من التاكسى )
ودفعت الخمسه جنيه وكان نفسى بعد كل الكلام دا ضمير السواق يصحى
ويقولى خليهم 3 جنيه بس يا باشا مش خمسه :D
شعب غلبان وسهل يتضحك عليه
لذلك دور كل واحد فينا فى التوعيه مهم سواء فى الشغل ولا التاكسى ولا الاتوبيس
عشان محدش يخلينا نشترى الترماى تانى !
** ملحوظه .. الصوره الخاصه بالبوست قمت بتعديلها لتتماشى مع موضوع البوست فقط !
E.E
Eslam Elbahrawy
