حقيقة العالم - مدونة إسلام البحراوى: ردا على نائب البرلمان صاحب مقولة المصرى يقدر يفطر بجنيه

ردا على نائب البرلمان صاحب مقولة المصرى يقدر يفطر بجنيه - تعالى هاحسبهالك بس ماتزعلش منى

ارحمونا .. كرهتونا فيكم اكتر ما احنا كارهينكم

- و كأنه برلمان جاء لعقابنا لاختياره وانتخابه

- وكأنه برلمان جاى من كوكب بلوتو الشقيق ومش عايش معانا

- نائب كل كلامه عن الجنس وكشوف العذريه ومهووس بالعذريه !

- ونائب تانى يقولك الجنيه يأكل اسره كامله

- السيد النائب المحترم عاطف مخاليف فى برنامج العاشره مساء طالع بيقولك ان الدنيا جميله والاسعار كويسه و ان الجنيه الواحد كفيل عشان يشترى فطار للفرد !

- سيادة النائب بدون الغلط فيك وفى اهلك ..

ارحموا الناس لان الناس قربت تنفجر

اقسم بالله هاتكونوا انتم اول ناس ننفجر فيهم

- مش ذنبنا ان سيادتك ماتعرفش الفطار بيكلف كام

ومش ذنبنا ان سيادتك ماتعرفش الناس الغلابه عايشه ازاى

ومش ذنبنا ان سيادتك من كتر فلوسك مفكرنا كلنا زيك

ومش ذنبنا ان سيادتك من قلة تواصلك بالناس مفكرنا عايشين فى سويسرا

- حد يقول للنائب المحترم الاّتى :

تعرف سيادتك ان باكو المناديل بقى بجنيه

تعرف سيادتك ان اللبانه الكلوريتس بقت بربع جنيه !

تعرف سيادتك ان بجنيه طعميه يعنى 4 طعميات

تعرف حضرتك ان بجنيه فول يعنى كيس غرا و شوية حب فول صغيرين

تعرف حضرتك ان فى مطاعم مافيهاش بجنيه فول والبدايه من 2 جنيه

تعرف حضرتك ان ساندوتش الطعميه فى المطعم الرخيص بقى بجنيه وربع

تعرف حضرتك ان ساندوتش الطعميه فى مناطق كتير وصل 2 جنيه

تعرف حضرتك ان ربع كيلو الجبنه الرومي ب 18 جنيه

تعرف حضرتك ان تمن كيلو الجبنه الرومى اللى هو نص الربع كيلو ب 9 جنيه وبيكون فيه 4 شرايح بالكتير ! مايشبعوش طفل فى ابتدائى

تعرف حضرتك ان البيضه بقت ب 80 قرش

تعرف حضرتك ان حزمة الفجل ولا الجرجير بقت بجنيه و دبلانه ومعفنه كمان

تعرف حضرتك ان كيلو الجبنه البيضا وصل 30 جنيه

تعرف حضرتك ان بجنيه مخلل ولا بتنجان من المطعم عشان نبلع الاكل بيكون خمس ولا ست قطع بتنجان محروق ومعفن وبناكل وبنسكت

تعرف حضرتك ان كوباية الشاى دلوقتى بتقف على الواحد ب 3 جنيه

تعرف حضرتك ان القرصه اللى بسمسم وصلت جنيه ونص و منفوخه وفاضيه من جوا

تعرف حضرتك ان بجنيه عيش فينو بقى 4 ارغفه

تعرف حضرتك ان شوية بطاطس محمره بالزيت بتاعهم يكلفوا 20 جنيه

- كل دا وماكلمتكش عن رفاهيات وقولتلك بقى الناس تاكل جبنه مثلثات ولا لانشون فراخ ولا جبنه كيري ... اه محدش يستغرب .. الحاجات دى بالنسبه لناس كتير رفاهيه بتتجاب فى الاعياد !

- قولنا بقى يا روح خالتك الجنيه اللى بتتكلم عنه دا انهى جنيه

الجنيه بتاع 2016

ولا الجنيه بتاع الملك فاروووق !

الفرد دلوقتى عشان يفطر فى شغله بيجيب اتنين فول و واحد طعميه ب 4 جنيه ونص

ومعاهم كوباية شاى قفلنا ال 7 جنيه

ماقولناش بقى نبقى زى البنى ادمين الطبيعيين وبعد الفطار دا تاكل ساندوتش حلاوه

ولا تجيب شيكولاتايه

- والنبى تتكتموا وتسكتوا لان الغلابه تعبانين وانتوا بتكبروا القهر جواهم

انتوا مش نواب شعب

انتوا نايبه سوده حطت علينا

#واحد_عايش_وسط_الغلابه

E.E