تحليل مجرد لفيديو سائق التوك توك - ثقافه مذهله - تاريخ عمرو الليثي - ظهور عمرو واكد - العبره من القذافى - حذف قناة الحياه للفيديو - وملاحظات اخرى قد تجعل الصوره اكثر وضوحا
** سائق التوك توك .. ومن النهايه **
- هانبدأ منين ولا منين
خلينا نجيبها من اخرها لان المراره مابقيتش مستحمله
- تعالوا نمشى مع الموجه ونقول ان :
1- سواق التوك توك مش اخوانى
2- سواق التوك توك مش متدرب على الكلام
3- سواق التوك توك مش قابض من عمرو الليثي
4- سواق التوك توك مش هو الدوبلير اللى جابوله صور فى الغردقه
5- سواق التوك توك مش زيه زي حماده المسحول !
6- سواق التوك توك يمثل شعب مصر من اسكندريه لاسوان
وبناء عليه ... وبما ان .. و إذن
مادام كلامه صح ومؤثر وقوى ويعبر عن الشعب
خدوه معاكم يوم 11/11 الجاي و انزلوا شيلوا السيسي بقى
انزلوا ياعم .. انا بحلفكم بالغالى تنزلوا
الراجل دا ماعملش حاجه وخاربها ومضيع فلوسها
خدوا بعضكم بقى كده صف واحد قوى وانزلوا شيلوه
ولما الملايين والجحافل من الثوار تنزل ضده وتشيله
هانقولكم شابوه وكامل احترامنا لارادتكم
قشطه الكلام ....؟ قشطه الكلام
نقعد ونستنى ونتفرج بقى
------------------------------------------
دا كان اولا ..
اما ثانيا عندى بس بعض ملاحظات بسيطه حصلت وبتحصل تزامنا مع واقعة سواق التوك توك ...
1- تعجبت من التقرير اللى عرضه عمرو الليثي انه بدأ التقرير من اوله لاخره ناس غلابه بتقول الاكل والشرب موجودين بس الجشع من التجار هو السبب
وفجأه فى اخر التقرير وبالصدفه يتم ختام التقرير بمقابلة الاخ سواق التوك توك اللى حصلت صدفه
------------------------------------
2- تعجبت من ثقافة سائق التوك توك المحترم وطريقة كلامه و سرده للاحداث
هاتقولولى الله؟ مش انت كنت بتقول الغلابه فى البلد دى بيفهموا
هاقولك اه .. بنقول كده لما بقابل بياع تين شوكى او عامل نظافه غلبان ويقولك يا بيه احنا عارفين ان بلدنا فى خطر .. و الاجانب عاوزين ياخدوا خيرها ..
كنت وقتها بقولك دى ثقافة توفيق عكاشه.. زى ما كان بيقول ثقافة المصاطب
الراجل اللى مش قارىء كتب او جرايد بس فاهم
انما بصراحه عجبنى ان سواق التوك توك بيتكلم عن المشاريع وعن سويسرا والصومال .. لدرجة انى تمنيت ان كل سواقين التوك توك يبقوا فى ثقافته !!!!!
** مش متلعثم .. مش خايف من الكاميرا .. مش بيفكر فى الكلام
مش بيتوقف لتكملة حديثه .. بيتكلم بشكل مستمر بدون اخطاء
بيرص الكلام بجمل معينه ..عارف امتى يتوقف وامتى يكمل
واخد القضايا تدريجيا .. مرتب القضايا
من الاكل والشرب .. للمشروعات .. لمحاسبة الحاكم قصاد ربنا !
عارف عدد الوزارات ( اللى انا معرفوش )
وبيتكلم عن مؤسسات عسكريه ومدنيه داخليه وخارجيه
بيتكلم عن فيينا عاصمة النمسا رغم اننا كلنا كمصريين لما بنتهكم بنذكر سويسرا.. امريكا..انما سائق توك توك بيتكلم عن فيينا .. !
بيتكلم عن انه من 100 سنه اليابان جاءت لمصر عشان تدرس النهضه المصريه
بيتكلم عن مصر تانى دوله فى العالم عملت خط سكه حديد
بصرااااحه يخرب بيت ثقافتك .. ياريتنى كنت خريج توك توك !!
--------------------------------------
3- هل هى صدفه ...
سواق التوك توك بيقولك الله يحرق المشروعات اللى مش بتفيد الناس
وعمرو واكد فى نفس اليوم ينزل تويته يقول ان مادام انتوا ساكتين على الفساد يبقى تستاهلوا
وفجأه يظهر فيديو يقال انه منسوب لمؤيدي السيسي تحت عنوان :
ريح دماغك يا ريس
والفيديو عامل ملايين المشاهدات وملخص الفيديو بيقول للسيسي ريح دماغك وبلاش تعمل مشاريع بنيه تحتيه و خلى الفلوس للاكل والشرب عشان شعبيتك ماتقلش !
كل دا فى يوم واحد... وكله موجه ناحية ايقاف المشاريع وعدم تنمية البنيه التحتيه !؟؟
------------------------------
4- لهذه الدرجه تنمية مصر من البنيه التحتيه خطر وشاغل بال ناس كتير؟
وبعدين وانا بفكر فى كل دا
تذكرت صديقه من ليبيا وهى بتقولى ...
القذافى الله يرحمه سبب من اكبر اسباب سقوط ليبيا سريعا فى يد حلف الناتو
قولتلها ليه؟
قالتلى لانه كان بيصرف كل الفلوس على الاكل والشرب والترفيه وعاوز يعيش الشعب فى رفاهيه
وترك ليبيا صحراء بدون مبانى او تنميه
وبالتالى كان سهل لاى عدو انه يخترق ليبيا والناس تتقتل بسهوله لان مفيش مكان يحتموا فيه ..ليبيا كانت صحراء .. وكانت اكبر غلطه لمعمر القذافى انه تركها بدون مشاريع تنميه و بنيه تحتيه تحمى البلد وقت الحرب !!!!!!!!!!!!!!!!!!!
** ثم تذكرت ايضا ما يحدث مؤخرا مع مصر فى مشاريعها الكبرى
مشروعات زى العاصمه الاداريه الجديده ومشروعات اخرى
فجأه الشركه الصيني تنسحب !
فجأه الشركه الاماراتيه تنسحب ويدخل بديل لها !!
كل الانسحابات دى فجأه كده !؟
----------------------------------
5- الامر او اللغز المحير ايضا
ان بدون ساااااااابق انذار او سبب مقنع
تقوم قناة الحياه بحذف فيديو سائق التوك توك من على صفحتها باليوتيوب
فيقوم الناس تهيج وتقولك ازاااى؟ هو عشان بيقول الحق؟
هو الحكومه ضغطت عليكم عشان تحذفوه؟
هو السيسي بيكمم الافواه فأجبر قناة الحياه على حذف الفيديو ؟
ثم يخرج عمرو الليثي يضع التاتش بتاعه ويقول للناس فى صفحته بالفيس بوك
اطمنوا الفيديو عندى وهارفعه على صفحتى !
اللـــــــــــــــــــــــــــــــــه .؟!!!!!!!
---------------------------------------
6- ...
لاحظت فى كلام الاخ سائق التوك توك
بيقولك قبل الانتخابات ماكانش فى ازمه فى الاكل والشرب والسكر والرز
قبل الانتخابات؟؟ اشمعنى قلت قبل الانتخابات ...؟
تقصد فترة عدلى منصور ؟
طب ليه ماقولتش ايام مبارك ..؟ لان انت من اللى مابيحبوش مبارك مثلا...؟
طب ليه ماقولتش ايام مرسى ..؟ لان ماينفعش يتعرف انك بتحب مرسى مثلا
اشمعنى قبل الانتخابات .. ؟؟ ليه مثلا راجل زى دا اتأذى فى اكل عيشه بعد 2011
ماقالش قبل 2011 والخراب اللى حصل كان فى اكل وشرب عادى
او ليه ماقالش ان بعد 2011 واللى مرت بيه مصر كان فيه اكل وشرب عادى
ليه ساب كل المراحل ومسك قبل انتخاب السيسي ......؟
_______________________________
7- كل دا بيحصل قبل 11 نوفمبر
وكل دا بيحصل مع افتعـــــــــــــــــــــــــــــال ازمة السكر
وكل دا بيحصل تزامنا مع ما تنشره صفحات الاخوان اللى نشرت فيديو سواق التوك توك اكتر من نشرها لاى فيديو تانى فى تاريخها !
اه كل دا بيحصل وفى خبر تانى مالوش اى علاقه باللى حاصل
ان برنامج ابله فاهيتا راجع فى اول شهر نووووفمبر !!!!!!!!!
__________________________________
خلاصة الكلام عشان بقيت بطول عليكم
دى بلد حره وديمقراطيه وبتاعت ثورات
وبناء عليه .. اللى مش عاجبه حد ينزل يشيله يا باشا
لو قدرت .. وماله تبقى صاحب حق
لو ماقدرتش .. تركن شويه بقي وتخلينا فى سكتنا
وعاوزكم تبقوا هاديين لان لسه هانشوف فى الاعلام الفتره الجايه
سواق التوك توك .. وبتاع الترمس والدره المشوي .. وكل حاجه
مع الاحتفاظ بحق الغلابه ان فى غلابه فعلا فى البلد دى
وفى ناس فعلا بتعانى فى البلد دى
وفى ناس فعلا مستنيه الفرج عشان عيشتها تتغير
بس اللى اقصدهم دول ولا عمرهم شتموا البلد ولا عمرهم هدموا فيها
E.E
Eslam Elbahrawy
