حقيقة العالم - مدونة إسلام البحراوى: رساله لعمرو اديب - عاد وعدنا معه - السيسي وتعديل الدستور لمد فترة الرئاسه

رساله لعمرو اديب - عاد وعدنا معه - السيسي وتعديل الدستور لمد فترة الرئاسه - مرحبا بعودة السم فى العسل

** وعاد عمرو اديب .. و عدنا معه **

** ترشح السيسي وتعديل الدستور **

- امبارح كانت اول حلقات برنامج عمرو اديب على قناة ON TV

طبعا من ايام ما كان عمرو اديب فى قناه مشفره والجميع يعرفه

اتفقنا او اختلفنا .. حبيناه او كرهناه لكنه هو من صنع التوك شو فى مصر

وهو الاعلامى الاكثر تأثيرا على الرأى العام فى مصر رغم انه فى قناه مشفره

ولو قولنا غير كده يبقى بنضحك على نفسنا

- يعلم اصدقاءى انى من اكثر من هاجموه وانتقدوه

ومن اكث من ارسلوا اليه الرسائل من خلالكم

واليوم قد نبدأ احداها

- للناس اللى ماكانتش بتتابع عمرو اديب لانه مشفر وكانت بتشوفه على فترات

اكيد هاتبتدوا تتابعوه بإنتظام بعد ما اصبح البرنامج فى قناه مفتوحه

وببساطه تعريف عمرو اديب انه هو الرجل اللى ( بيلعب ) دور المعارض الوطنى

او خلينا نقول بطريقتنا احنا بقى اللى اتعودنا عليها مع بعض

انه احيانا كثيره بيلعب دور السم فى العسل !

- فى حلقة امبارح بدأ عمرو اديب اول حلقاته فى الموسم بالحديث فى اخر ما كان اختتم به الموسم الماضى .. وهو ترشح الرئيس السيسي لفتره ثانيه

- هنا .. على البروفايل دا . لما كان عمرو اديب لسه فى قناة اليوم فى اوربت

قلت لعمرو اديب انت ليه بتتكلم بلسان الشعب ؟

وليه كلامك مش واضح ؟

وليه لما بتتكلم عن الرئيس وترشحه لفتره تانيه بتتكلم بكلام ملاوع وغير مباشر؟

- فى حلقة الامس

وهو بيتكلم عن الرئيس ..

قال حاجات كتير

يعنى قال ان الريس لازم نختاره بسبب اعماله المفيده للبلد

مش بس لانه من القوات المسلحه او لانه عمل ثورة 30 يونيو او لانه وقف ضد الاخوان

وان لحد الان ماشوفناش حد قرر يعرض نفسه للشعب كمرشح فى 2018 قصاد السيسي

ولعل كل ما سبق مش هانقف عنده .. لان اكيد فى شعبنا حاليا ناس ليها اكتر من تفكير

اللى كاره السيسي

واللى بيحبه ايا كان اللى بيعمله

واللى بيفكر بتفكير السياسه .. رئيس وهانشوف عملنا ايه ونقدر نحاسبه بعيد عن الثوره والاخوان وما الى ذلك

- لكن .. اللى لفت انتباهى ان عمرو اديب بحسه بيغيب الرأى العام لما بيتكلم عن ترشح السيسي لولايه اخرى

يعنى امبارح عمال يقول انا ضد تعديل الدستور عشان الرئيس يمسك فتره اطول

انا ضد اننا نلعب فى الدستور عشان الريس يتعدله مدة الرئاسه

وبيقول ان الرئيس السيسي نفسه مالوش مزاج و زهق من كتر الهموم

وهنا الرد على عمرو اديب

اولا يا فندم لما تتكلم عن فتره جديده للرئيس السيسي .. لو ان نواياك مش سيئه .. كان لازم تقول الجمله كامله وتقول ان انا برفض تعديل الدتور ان السيسي ياخد ولايه تااااااالته...

لان اصلا الدستور بيتيح للرئيس انه يترشح ولايتين .. كل ولايه 4 سنين

هو حاليا فى فترته الاولى .. يعنى ترشحه بالثانيه وفوزه بها هو امر دستوري

لكن كلامك الملتوى .. اظهر للبسطاء من الشعب ان ترشح الريس لفتره تانيه هايكون باللعب فى الدستور وذلك محض كذب واقتراء

- ثانيا ...

الرئيس وحده من يقرر الترشح من عدمه يا سيد عمرو

الرئيس وحده اللى يقول انا زهقت وكرهت هموم البلد ومش عاوز اكمل

لان الرئيس نفسه هو اللى قال فى اكتر من خطاب مؤخرا عندما سألوه عن الترشح

قااااااال انا تحت امر الشعب

وسواء يقصد ان الشعب يطلب منه او ان الشعب يقوله لا

الرئيس عبد الفتاح السيسي هو مواطن مصرى

يحق له حق الترشح فى انتخابات 2018

ويحق لمواطنين اخرين مادام استوفوا الشروط ان يترشحوا امامه