مواجهة الحقيقه افضل من انكارها - اعلان بيريل ضد الجيش المصرى كان استغلال لشريحه ضائعه من الشباب
** واجهوا الحقيقه ... بيريل بتلعب على الوتر الملموس !!
- بدايةً وقبل اى شىء
يارب الناس دلوقتى تكون استوعبت اننا لما بنحذر من شركات واعلانات معينه .. مابيكونش كلامنا من الهوا .. وبيكون الكلام قائم على تحليل للاعلانات والشركات المنتجه التى تقف خلف انتاج تلك الاعلانات
- اذكر انى حذرت او لفتت نظر الناس من بفتره عن اعلان بيريل بتاع 30 سنه
وقلت اشاره واضحه وصريحه لفترة حكم الرئيس مبارك !
ومع ذلك محدش كان عاوز يستوعب
---------------------------------
** بخصوص اعلان بيريل اللى بيقول ان حلم كل شاب انه ياخد شهادة الاعفاء من الجيش ..
الناس ثارت وقامت وعملت مواضيع وحلقات فى التلفزيون وبيهاجموا الشركه
اكيد طبعا متفقين ان الشركه واعلاناتها مغرضه والاعلان قذر
لكن .. ليه مافكرناش شويه فى حقائق بنحاول نتجاهلها
1- الاستاذه اللى عاوز تفدى الجيش بدمها وسنها فوق الخمسين .. والاستاذ اللى عنده 40 سنه ومش عاجبه الاعلان .. والاخ اللى عنده 35 سنه وبيقول هاقاطع بيريل .. والمدام اللى سنها فى اواخر التلاتينات اللى منزعجه من الاعلان وغيرانه على الجيش
هو حضراتكم متضايقين ليه؟ داهيه لا تكونوا مفكرين ان الاعلان موجه لينا؟
يا فندم الاعلان .. وبيريل .. مافكروش فينا اصلا
الاعلان مش عشاننا
بيريل استغلت وجود شريحه هى الظاهره على السطح حاليا
وهى دى اللى يهمها ان الاعلان يوصلهم
وهى دى اللى الاعلان بيخاطبهم
-------------------------------------
2- ايوه حضرتك
هل حد عنده الجرأه ينكر ان الشباب فى مصر من سن 15 ل 22 ضايع بمعنى الكلمه وملعوب فى دماغه؟
حد يقدر ينكر ان اصحاب صفحات الكوميكس والتريأه على مؤسسات الدوله واهانة الجيش والقضاء والشرطه والشماته فى الشهداء ومساندة الاخوان ومساندة دعوات هدم الدوله هى كلها صفحات يقودها شباب فى مرحلة المراهقه من 15 ل 22 ؟
طب وننكر ليه
من كام يوم نشرتلكم الصفحات اللى كانت مغرقه الفيس بوك والانستجرام صور تريأه .. وبتعمل مقارنه بين تل ابيب ومصر فى 2016 ..؟
---------------------------
3- هاتنكر ليه ..؟
هو احنا كل واحد فينا مايعرفش شاب اخوانى وبيكره الجيش وموجود فى الجيش دلوقتآ؟
هو احنا مابنشوفش صور مجندين فى الجيش عاملين علامة رابعه؟
هو احنا مابنشوفش ناس دخلت الجيش وخرجت منه وهى لسه بتكرهه؟
هو احنا مابنشوفش بعيوننا ان اللايكات اللى بالالاف على اي بوست ضد الدوله او الجيش بيكون كلها من شباب فى السن دا ؟
ايوه الشريحه دى موجوده .. ايوه الشريحه دى تم السيطره عليها
ادخل صفحات الكوميكس على الانستجرام
هتلاقى الاف من الشباب بيعمل لايكات على كوميكات زى :
- مين قال ان الهجره من مصر بتوجع.. انا مهاجر اهو وعندى عربيتى وشقتى ومتجوز واحده اجنبيه
- لو لقيت مصباع علاء الدين هاطلب منه نسكافيه و شيكولاته وتأشيره لتل ابيب
3- دا غير طبعا كوميكات ضد القضاء والجيش و الريس نفسه بيرسموهم وهما ماسكين منشار او سكاكين وبيدبحوا فينا وبيقولوا عليهم سفاحين
---------------------------------
4- هانوصل فى النهايه الى حاجتين
الاولى ان شركة بيريل اعلانها قذر وهدفه قذر
والحاجه التانيه ان بيريل مش بتشجع الشباب مايروحوش الجيش
لان اصلا الاعلان موجه للشباب اللى تم اقناعه ان الجيش عدو !!!
فهما مش محتاجين يقنعوهم بحاجه
هما بس بيزودوا التأكيد !!
------------------------------------
ربوا عيالكم وبصوا عليهم
العيال رايحه فى داهيه
اقعد مع واحد منهم واسمع كلامه قلبك هاينقبض والله
ايوووه فى شباب محترم وجميل وبيحب البلد والجيش
بس فى السن دا .. من 15 ل 22 .. لا..المغيبين اكتر
اعلان بيريل ما هو الا جرس انذار
اقولكم على حاجه ...
بلاش بيريل .. وبلاش صفحات الكوميكس
ادخلوا صفحة افيخاى ادرعى المتحدث بتاع الجيش الاسرائيلي
وشوفوا الشباب اللى فى الاعمار دى كاتب ايه عن مصر !!!!
والسلام ختام
E.E
Eslam Elbahrawy