مسرح مصر وباسم يوسف - لماذا هاجمت نقابة الصحفيين مسرح مصر بعد حلقه انتقدت العاملين بمهنة الصحافه وافعالهم
مسرح مصر - وباسم يوسف - واللى على راسه بطحه !!
================
فى الحلقه الاخيره من مسرح مصر للنجم اشرف عبد الباقى
كان بيتكلم عن مضمون الصحافه واللى بيحصل اليومين دول
خلينا متفقين ان مازال اشرف عبد الباقى هو الفنان الوحيد اللى بيواجه بالفن حاليا
والوحيد اللى مسرحياته بتتضمن رموز وصور بتكون رد بليغ على احداث سياسيه واجتماعيه واحيانا ضد الماسونيه كمان !
===========
فى الحلقه دى اشرف عبد الباقى حاول يلقى الضوء على حال الصحافه
ما بين رئيس التحرير الفاشل اللى بيعتمد على تلفيق الاخبار والشعلله عشان يتشهر ويجيب فلوس .. وما بين الصحفيين اللى مش اولاد المهنه .. اللى كان بياع جرايد وبقى صحفي واللى خريج معهد موسيقي وبقى صحفى .. فى إشاره منه ان المهنه بقت بتلم !
================
اشرف عبد الباقى ختم الحلقه بجمله جميله وهو بيتكلم مع الفراش بتاع مكتبه اللى هو اصلا بيكتبله مقالاته !
هى تعتبر 1X2
قال وهو بيتكلم بلسان رئيس التحرير:
من النهارده خلاص لازم ارجع اكتب مقالات محترمه
ونكتب كل حاجه على حقيقتها ومانتبلاش على حد
وعشان كده لازم وانت بتكتبلى المقال الجاى ( بيكلم الفراش بتاعه )
لازم تبقي حريص فى كل حجاه بتكتبها
يعنى اشرف عبد الباقى بيوصلنا رساله ان ديل الكلب عمره ما يتعدل
اوقات بيقرر يكون محترم لكن .. الطبع يغلب التطبع
==================
الغريب بقى
ان مسرح مصر مش بيعمم .. بيذكر مثال
لان الصحافه زيها زى اى مجال فيها الحلو والوحش
ومن غير الفاظ خارجه ولا ايحاءات سيئه .. الحلقه كانت نضيفه وبتعرض وجهة نظر
لما كنا بنشوف باسم يوسسف بيتكلم بإيحاءات جنسيه .. كنا نعترض فكانوا يقولوا حرية ابداع وحرية رأى
لما يطلع صحفى يقول يسقط حكم العسكر ويطالب بتدمير جيش البلد ونعترض على كلامه يقولوا حرية رأى وتعبير ووجهة نظره
لما يطلع عمرو اديب ورانيا بدوى يقولوا لوزيرة الاستثمار يا فاشله
يقولوا دى حرية اعلام وحرية تعبير ووجهة نظرهم
لما يطلع اليوم السابع والمصرى اليوم وبوابة فيتو يفبركوا اخبار عن عدد الشهداء فى سيناء و ان جماعات ارهابيه احتلت سيناء .. ونعترض ان الاخبار كاذبه..يقولوا مهنة الصحافه مهنة الخبر واحيانا بيكون فى اخطاء لكن للصحافه حريتها
كل دا حريه بالنسبالهم
لكن لما اشرف عبد الباقى يعمل حلقه واحده يسلط الضوء على ظاهره فعلا كلنا شايفينها وهى فساد الصحفيين والمؤسسات الصحفيه ووجود صحفيين ليسوا من ابناء المهنه ولا ينتمون اليها .. يطلع اعضاء نقابة الصحفيين يهاجموا مسرح مصر ويطلع رؤساء تحرير يهاجموا مسرح مصر واشرف عبد الباقى بتهمة اهانة مهنة الصحافه
بالذمه مش مكسوفين من نفسكم؟
احنا بقى المره دى هانقولكم دى حرية رأى وحرية تعبير
لانكم فعلا اصبح الجزء الاكبر منكم فاسد ومرتشى وخاين للوطن
واصبحت نقابة الصحفيين مثلها مثل نقابات اخرى اصبح الشعب المصرى يري فيها كيان يمثل اهانة وهدم الدوله
واللى على راسه بطحه بقى !
** شكر خاص للاستاذ نادر صلاح الدين مؤلف مسرح مصر على موضوعاته اللى دايما بتلمس الجزء اللى نفسنا حد يتكلم فيه فى وسط الفوضى الاعلاميه ضد البلد !
E.E
Eslam Elbahrawy