تحذير من عمرو اديب للداخليه - وتوضيح من الشعب لعمرو اديب - هاتعرف مين اللى اتلسع من 25 يناير ومين اللى هاينفخ فى اللى جاى
** من عمرو اديب للداخليه .. تحذير
ومنى انا لعمرو اديب .. توضيح
والله اعلم .. مابقاش فى ثقه ان الرساله هاتوصل !
------------------------------------------
** فى حلقة الاثنين من برنامج عمرو اديب كل يوم على قناة اون تى فى
قال الاعلامى تعليقا على بيان وزارة الداخليه انها لن تسمح بالفوضي مره اخرى
ان الداخليه عليها ان تأخذ حذرها
وان اللى اتلسع من يناير .. ينفخ فى نوفمبر
( اشاره لحرق الاقسام والسجون وقتل الضباط وتهريب المساجين )
----------------------------------------
وهنا أود ان انقل ردى وتوضيحي للاستاذ الاعلامى على تحذيره
لان طبيعي اللى اتلسع..بينفخ فعلا
بس هو اختلط عليه الامر .. لانه مش عارف مين اللى اتلسع
ومين اللى هاينفخ
شوف حضرتك :
1- اللى اتلسع من نكسة يناير كانوا احنا اللى ارزاقنا اتقطعت
2- اللى اتلسع من نكسة يناير كانوا احنا لما وقفنا فى الشارع خايفين البلطجيه يهجموا علينا
3- اللى اتلسع من نكسة يناير كانوا احنا لما كنا بنخاف على امهاتنا واخواتنا البنات من الخطف والاغتصاب وقت انهيار الامن
4- اللى اتلسع من نكسة يناير كانوا احنا لما الفقير ازداد فقر والحرامى ازداد سرقه ونصب وفلوس
5- اللى اتلسع من نكسة يناير كانوا احنا لما بيوت اتخربت و شركات اتقفلت ومصانع وقفت وعمال اتمرمطت وابناء جاعوا وزوجات اتطلقوا بسبب ان مفيش شغل
6- اللى اتلسع من نكسة يناير كانوا احنا لما فنادقنا اتقفلت وسياحتنا وقعت وعملتنا انهارت والاحتياطى النقدى قل والاسعار زادت
7- اللى اتلسع من نكسة يناير كانوا احنا لما البلطجيه والحراميه والاستغلاليين والخونه واللى باع واللى قبض واللى تاّمر واللى عميل واللى خاين بقوا هما ضيوفكم فى التلفزيون تحت دعوى الاحرار والثوار واحنا فى بيوتنا مش لاقيين ناكل
8- اللى اتلسع من نكسة يناير كانوا احنا لما خرجتوا الارهابيين من السجون وعملتوا منهم رؤساء واصحاب قنوات واصحاب احزاب واصحاب مشروعات وخليتوهم ولعوا فى البلد
9- اللى اتلسع من نكسة يناير كانوا احنا لما خليتوا فى كل بيت فى شهيد للجيش والشرطه بسبب ارهاب الكلاب اللى هربتوهم وقت النكسه
10- اللى اتلسع من نكسة يناير كانوا احنا لما خليتوا الغلابه يجروا ورا كلامكم واشاعاتكم وكدبكم والمليارات المدفونه والكنوز المصونه اللى هاتيجي تغرق البلد لما خليتوا الناس بطلت تشتغل وبقت قاعده مستنيه الفرج
11- اللى اتلسع من نكسة يناير كانوا احنا لما شوفنا اقتحام امن الدوله بعيوننا والعيال اللى كانت بتلبس شبشب زنوبه اخدت ملفات الخيانه بتاعتها وبقت بتركب عربيات اخر موديل وطلعتوهم فى اعلامكم وقولتوا عليهم من الاحرار و بررتوا الخيانه والعماله
12- اللى اتلسع من نكسة يناير كانوا احنا لما كنا نروح نخلص مصلحه من سجل مدنى ولا مركز اصدار بطايق ويقولك فوت علينا بكره اصله اتحرق ايام النكسه ولسه بنوضبه
13- اللى اتلسع من نكسة يناير كانوا احنا لما قضايانا واوراقنا كلها راحت علينا لما اتحرقت فى المحاكم وحقوقنا راحت وماقدرناش نجيبها
14- اللى اتلسع من نكسة يناير كانوا احنا لما بلدنا بقى يتم التجرؤ عليها من بلاد ماتجيش مساحتها مساحة شارع فى مصر زى قطر وتركيا واثيوبيا وغيرهم وبقينا ملطشه لانكم كنتوا بتسمحوا بتهزيق وشتيمة كل كبير يمسك البلد لحد الناس برا ما عرفت ان مالناش كبير وبقوا يستهزأوا بينا
15- اللى اتلسع من نكسة يناير كانوا احنا لما وافقتوا تصنعوا من الانجاس ابطال ولما عملتوا من اصحاب هتاف يسقط حكم العسكر ابطل يسعون وراء الحريه وليسوا خونه يهدفون لاسقاط جيشهم
16- اللى اتلسع من نكسة يناير كانوا احنا لان اللى اتكلم عنها الناس اللى معاها فلوس .. الناس اللى طلعت ايام مظاهرات يناير وكان الشاب يقولك انا عندى شغلى و عربيتي ونازل اتظاهر عشان الغلابه ..وللاسف دول اكتر ناس اصلا مايعرفوش حاجه عن الغلابه .. مابيتكلمش عن التظاهر الا اللى فى جيبه فلوس وبابا وماما فاتحين بيته وبيعطوه مصروف يصرف على مراته ومش حاسس بحاجه..انما لو حاله هايقف ومش هيلاقى ياكل ماكانش اتكلم فى خراب وقرف
17- اللى اتلسع من نكسة يناير كانوا احنا لما خليتوا العيل الصغير بتاع الالتراس اللى بيقف قصاد المدرس فى الدرس يفتح ايده ينضرب بالعصايه .. يروح الاستاد ويمسك عميد شرطة فى سن اكبر من سن ابوه حتى ويشتمه ويضربه ويحدفه بالبول
18- اللى اتلسع من نكسة يناير كانوا احنا لما ولادنا ماتوا بسبب تخطيط الشياطين فى بورسعيد وكلكم كإعلام ساهمتم ومازلتم تساهمون فى رواية ان الجيش والمشير طنطاوى والشرطه هم من دبروا القتل للاولاد
19- اللى اتلسع من نكسة يناير كانوا احنا لما سمحتوا للخونه يعصروا لمون ويجيبولنا رئيس جاسوس منتمى لجماعه ارهابيه وفهتمونا ان دى الحريه
20 - اللى اتلسع من نكسة يناير كانوا احنا لما اتحولنا من شباب عنده طاقه بياخد مرتبات محترمه لشباب دلوقتى بسببكم فاقد الامل بيشتغل 12 ساعه ومابيقدرش يجمد الف جنيه اخر الشهر وبقى مصيرنا اسود بسبب اللى عملتوه فى خمس سنين فاتوا
21- اللى اتلسع من نكسة يناير كانوا احنا لما الارهاب استوطن فى سيناء و العالم كله تاّمر علينا وبقى الكل بينهش فينا واللى يوقعلك طياره واللى يحرقلك مركب واللى يفتح حدوده معاك للارهابيين واللى عاوز ياخد حته من ارضك يضمها لارضه واللى واللى واللى واللى .. كل دا بسببكم بعد ما حرقتوا البلد واضعفتوها
22- واخيرا ... وتانى .. وتانى .. وتانى
رغم كل ما ذكر فى الاعلى من خساير
الا اني هاختم الخساير .. بأهم الخساير
ان كل يوم فى بيت فى مصر بينام لابس اسود بسببكم
بسبب ان له شهيد مات
اللى اتلسع من نكسة يناير ام الشهيد اسلام عبد المنعم اللى كان حلم حياتها تجوزه
و العميد عادل رجائى اللى استشهد قصاد مراته واهله
والنقيب محمد الكومى ابن بلدى طنطا فخرى وفخر كل طنطا اللى فقد نص اعضاء جسمه وراجع واقف زى البطل وسط ولاده واهله ...
والمقدم ساطع النعمانى اللى فقد بصره وجسمه وراجع بطل من تانى
هما دول اكبر الخساير .. دول واللى زيهم اكبر اللى اتلسعوا من نكسة يناير
يارب يكون حضرتك فهمت ان فى 28 يناير 2011 اللى اتلسع ماكانش الداخليه
اللى اتلسع كان مصر كلها
-------------------------------------
وبناء عليه ...
زى ما احنا اللى اتلسعنا
توقع ان احنا اللى هاننفخ !
مش شرط يوم 11/11 لانه يوم وهمى ومش هايحصل حاجه
ولكن فى اي 11/11 تانى .. اي وقت تانى
مش حرب اهليه .. لا..بس زهقنا
انا لو فاتح محل اكل عيش وعدى عليا عيل بيقول 11/11 وكسرلى ازاز بترينه ؟ اقسم بالله لاقسمه نصين ...
انا لو اخويا او امى ماشيين فى الشارع وحد حدفهم بطوبه ولا اعتدى عليهم
اقسم بالله لاقسمه نصين
اللى يختار يحولها لغابه يستحمل
** وياريت تكون فهمت مين اللى اتلسع ومين اللى هاينفخ
لان خلاص..زهقنا وبقى عندنا مناعه من الخوف والموت
وبقى اهون حاجه عندنا الموت ومابقيتش تفرق
والواحد لو هايموت عشان يحط تحت رجله عيل خاين
احسن ما يموت وهو متعلق ولا محطوط جوا قفص من بتوع داعش وبيتولع فيه كرهينه مصريه تم اختطافها لعدم وجود جيش وشرطه فى مصر !!
--------------------------------
وسلامو عليكو
E.E
Eslam Elbahrawy