شفرة الحقيقة - مدونة إسلام البحراوى: بعد الظهور مع ابله فاهيتا - رساله الى عمرو مصطفى

بعد الظهور مع ابله فاهيتا- رساله الى عمرو مصطفى - عتاب محبين وليس تخوين او اساءه

ممم من المرات القليله اللى ماعرفتش فيها ابدأ الكلام منين

الصوره اللى حسستنى بأكبر شعور من الاحباط من سنين كتير اوى

======

خلينى الاول أأكد على اهم حاجتين فى البوست دا

الاولى : لا تشكيك نهائيا فى وطنية عمرو مصطفى و دا امر مفروغ منه ومنتهى

الثانيه : انا عارف ان دا هايستخدم ضدى .. ايوه

لان ناس كتير عارفه من زمان حبى لعمرو مصطفى وبالتالى ظهوره مع فاهيتا هايستخدمه ناس كتير للضرب فيا ويتقال كلام كتير لكن ( ياما دقت على الراس طبول ) :)

=============

** هو عتاب .. واندهاش .. وحزن ماقدرش انكره

لما كنت بلبس الصبح ونازل شغلى وبفتح التلفزيون بالصدفه لقيت اعادة حلقة ابله فاهيتا وببص لقيت عمرو مصطفى موجود .. لوهله والله فكرت ان دا تركيب او فقره كوميدي بالجرافيكس من البرنامج .. لكن بعد تركيز .. تأكدت انه عمرو مصطفى

============

** خلينا نتفق ان الانسان ممكن يتغير عنده حاجات كتير

يعنى عمرو مصطفى ممكن كان مقتنع بنظرية المؤامره وحصل اللى خلاه يغير رأيه

ممكن كان مقتنع ان صفحات زى فاهيتا وغيرها كانت بتشترك فى نشر اشارات لعمليات معينه وحصل اللى خلاه يغير رأيه

ممكن كان مقتنع ان فاهيتا ( من يحركها ) بيستخدم السخريه واوضاع البلد لاثارة الرأى العام وحصل اللى خلاه يغير رأيه

وهذا حق مشــــــــــــــــــــــــــروع محدش يقدر يلومه

وبناء عليه مش هاتكلم عن ظهوره مع حد مرتبط بنظرية المؤامره

وهاتكلم من الجانب الاخلاقى

============

انا قلت ان الصوره .. الحلقه دى .. كانت اكبر شىء حسسنى بالاحباط من سنين كتير اوى .. ولاول مره حسيت ان الشر ممكن ينتصر فعلا على الخير...

ولأول مره احس ( انهم ) قادرين ينتصروا علينا

لان لما كنت بشوف شهداء الجيش والشرطه ماكنتش بحس بإحباط .. لانى عارف ان تانى يوم هاييجي حقهم .. ولما كنت بشوف البلد بتمر بأزمه ماكنتش بحس بإحباط لانى كنت واثق فى الشعب و جيشه ... لكن قمة الاحباط لما اشوف حد محترم يظهر مع حد غير محترم... هنا اكيد فى حاجه غلط

==============

- مافهمتش ازاى عمرو مصطفى اللى هاجم ثورة يناير لانها هدمت الاخلاق

يظهر فى برنامج اساسه انعدام الاخلاق

- مافهمتش ازاى عمرو مصطفى اللى هاجم باسم يوسف لانه بيهدم الاخلاق

يظهر فى برنامج اساسه انعدام الاخلاق

ومقدميه و من يقومون بإعداده هم شركاء باسم يوسف و هو من انتجهم

فاهيتا نفسه برزت من خلال باسم يوسف

- مافهمتش ازاى عمرو مصطفى اللى هاجم الاسفاف بما انه فنان عبقرى و دى حقيقه

يظهر فى برنامج قائم على الايحاءات الجنسيه والالفاظ الخارجه

- وللاسف ظهر الإسفاف دا فى الحلقه

ووقت ما سمعت عمرو بيضحك وهو بيملا الابلكيشن قصاد ( بنت فاهيتا )

وهى بتقوله لما تطلع فوق هاتعرف..انت لابس بأستك ولا ايه؟

وكان ايحاء مفهوم طبعا

تساءلت طب ازاى .. والراجل دافع عن الاسفاف وقلة الادب

والراجل دافع عن اطفالنا واللى بيسمعوه ويشوفوه من اسفاف فى البرامج دى

وتساءلت لو ان طفل من الاطفال اللى بيظهروا فى اغانى عمرو الوطنيه

سأله عن معنى الايحاء دا اللى ضحك عليه..؟ هايقوله ايه؟

====================

حاولت ادخل من شويه على صفحة الفنان المحترم

وجدت تعليق له بيقول

( خلى الناس تشوف عمرو مصطفى الحقيقي بقى )

وهنا ليا عتاب عليك يا عمرو

اولا انا بحب عمرو مصطفى الانسان اللى شوفته فى مواقف كتير

حتى لو عن طريق التلفزيون او الانترنت بس ظهر اللى جواه بجد

وقت لما كان قاعد بيبكى قصاد محمد دياب بعد نكسة يناير

والناس كلها عارفاك يا عمرو ومش محتاج ان حد يعرفك

ثانيا .............

عمرو مصطفى مش محتاج انه يقول هو مين كفنان

عمرو مصطفى العبقرى اللى الحانه زودت عشقى انا شخصيا لعمرو دياب

عمرو مصطفى اللى لحن لكل الكبار فى مصر والعالم العربى

عمرو مصطفى اللى الحانه موجوده فى اوروبا

عمرو مصطفى ماكانش محتاج يظهر مع فاهيتا عشان يقول هو مين

عمرو مطصفى ظهر على اكبر شاشات الوطن العربى واكبر برامجها

عمرو مصطفى لو فكر يخبط على باب اكبر قناة فى العالم العربى هايتفتحله الباب بسرعة الصاروخ بل اظن ان القنوات الكبيره هى اللى بتجرى وراه لاستضافته

واخيرا

عمرو مصطفى لو كان حابب يعرف الناس هو مين كفنان

كان بكل بساطه يقدر يحط رجل على رجل

ويفتح صفحته ويكتب ويقول:

هذه اعمالى مع عمرو دياب

وسميره سعيد

شيرين

وحماقى

وشيرين وجدى

ومصطفى قمر

وراغب علامه

وفارس

وعامر منيب

ونوال الزغبى

وهشام عباس

وفضل شاكر

ومحمد منير

وايهاب توفيق

وعشرات من المطربين ممكن اليوم كله نقعد نكتب فيهم

وقبــــــــــــــــــــــــل كل دول

كان كفايه يكتب قائمة اغانيه الوطنيه

كان كفايه يكتب ان الحانه الوطنيه كانت خير سند للمصريين فى السنوات الاخيره

كان كفايه يكتب ان مفيش اغانى وطنيه عايشه فى الخمس سنين الاخيره الا اللى من الحانه

كان كفايه يكتب انه الملحن اللى عمل الموسيقي العسكريه فى الحانه وحركنا كلنا

كان كفايه يكتب ان كل مظاهره فى حب مصر كانت بتسير واغانيه شغاله

كان كفايه يكتب ان هو اللى اعطى الامل بلحن اغنية طوبه فوق طوبه

كان كفايه يكتب ان هو اللى عمل لحن بشرة خير اللى كانت رمز ( فنى ) ل 30 يونيو من خلال الدعوه لانتخابات الرئاسه اللى كانت بتمثل اصعب المراحل فى تاريخ مصر

كان كفايه تكتب انه هو اللى ابكى ومازال يبكي الجميع بأغنية شيرين اللى انت لحنتها

اغنية جنودنا رجاله ... اللى بتقول :

عن رجال عاشوا الحياة دي عشان بلادهم

ولا جم في يوم اتكلموا وخلفوا في وعودهم

فيه اللي ساب أهله وحياته ودنيته وناسه

وشال سلاحه فوق كتافه وعلمه فوق راسه

وفي عز نار الشمس وفي عز الصيام

كان ع الحدود واقف وجاهز للشهادة

الله اكبر لما قالها الكل قام

واتزلزلت الارض من صوت البيادة

جيشنا عمره ما ساب عدو قتل ولاده

ومضاعش حق شهيد هدر كله في ميعاده