احد الاقباط الذين تركوا العريش يكشف المؤامره التى تحدث على مصر ويفاجىء الجميع بتصريحاته
قبل ما نتكلم عن موضوع المسيحيين فى العريش
لازم الاول نشوف كلام الراجل دا كوووويس اوووى
===========
معلش .. اتعبوا فى القراءه .. واتعبوا انكم تخلوا الناس تقرا الكلام دا
تعبكم فى القراءه .. مش هاييجى زى تعب ناس اتقتل اهاليها قصاد عينيها
الاستاذ رفعت فوزى .. مصرى مسيحي من اللى رحلوا من العريش الى بيت شباب فى الاسماعيليه.. انا مشغل الفيديو .. و بفرغ كلامه بالنص :
** انا جيت من شمال سينا بعد ما الارهابيين دخلوا على جوز اختى و ابنه وقتلوهم وحرقوا البيت وولعوا فى الجثث بتاعتهم
=====
** انا سيبت البلد مش لانى اتعرضت لتهديد مباشر .. لكن لانى شايف كل يوم ناس بتتقتل
لكن مش المسيحيين بس اللى مستهدفين
المسحيين مستهدفين والمسلمين اللى بيتعاونوا مع الشرطه والجيش مستهدفين
الشرطه والجيش نفسهم مستهدفين
كلنا بنسمع كل يوم عن شهداء شرطه وجيش ومدنيين مسلمين ومسيحيين
وبالمناسبه الايام دى مش اول مره يحصل مع المسيحيين كده
احنا من 2011 والمسيحيين فى سينا مستهدفين
كانوا بيطلبوا فديه وبعد ما ندفعها .. يقطعوا رؤوس المسيحيين ويعلقوها على الابواب
====
** لكن بعد السنه العصيبه بتاعت 2011 اللى مرت علينا
لما تدخل بعدها الجيش .. اتحكم الوضع شويه
اصبح الجيش والشرطه حاكمين الوضع
زى ما يكون حد كان له دراع واحد وبقى له دراعين
=====
** ايوه الجيش والشرطه حاليا عندهم اجهزه حديثه ومتطوره
لكن الارهاب ارهاب .. بيحصل فى امريكا وبيحصل فى فرنسا وفى اى مكان
الارهاب ..مش دوله بتحارب دوله
انا لما بحارب دوله ..ببقى عارف الدوله دى بحاربها وتحاربنى
لكنى بحارب عدو خفى..زى ما اكون بحارب عفريت
هو العفريت حد بيشوفه؟
انا مش بقول كده عشان اجامل الشرطه ولا اجامل الجيش
هما بيتقتلوا زينا .. انما فعلا الوضع صعب
====
** المذيعه : لو الوضع استقر في سينا وطلبوا منك ترجع تانى هاترجع ؟
هو حضرتك مفكره انى خارج من سينا مبسوط
انا قاعد فى سينا اربعين سنه انا فى سينا من ايام ما كانت سينا كلها قطعه واحده
قبل ما تبقى شمال وجنوب
========
** المذيعه : حضرتك شايف ايه فى الوضع دا .. اننا نسيب سينا ونمشى؟
لا..انا مش هاسيبها خالص
انا اسيبها عشان دى عمليه كر و فر
وانا بحارب عدو خفى ومش شايفه وهو بيتمكن منى
انا هابعد شويه لحد ما الاوضاع تستقر ومش ممكن هاتخلى عنها
محدش يقدر يسيب بلده
هو مش كتير بيكون فى حى بيتشال ويقولوا للناس هانجيبلكم شقق فى حى ارقى
والناس بترفض تخرج من الحى بتاعها .. لان دا الحنين والانتماء للمكان
====
** المذيعه : فى كلام كتير وحاجات كتير بتتقال .. تقول ايه برساله منك للناس اللى بتسمع اخبار كتير غلط عن اللى بيحصل فى سيناء ؟
انا اه اعرف ان فى ناس كتر بتقول كلام كتير
لكن انا لازم اقول سلبيات وايجابيات
يعنى مثلا قالوا الجيش بيقتل المسيحيين
طبعا استحاله .. ماهو الجيش فيه مسيحيين
هو الجيش بتاعنا كله مسلمين بس ؟
والطلقه مش بتفرق وبتشيل اللى قدامها
ما كلنا بنشوف كل يوم مسلمين ومسيحيين شهداء جيش بنشيع جنازاتهم كل يوم
الكلام دا مش صح .. الجيش مش ممكن هايقتل نفسه
=====
** المذيعه : البقاء لله وربنا يعزيكم .
انا عاوز اقول لحضرتك حاجه
مصر هى مصر
عمرها ما اتكسرت
لا ارهاب هايكسرها ولا جماعات هاتكسرها
ولا هايفرقوا بين مسلم ومسيحي
انا معرفش اللى واقفين حواليا دول مسلمين ولا مسيحيين
ويمكن انتوا لو مش عارفين انكم بتعملوا حواركم مع واحد مسيحي ماكنتوش عرفتوا انى مسيحي
انا معرفش حضرتك مسيحيه ولا مسلمه
كلنا حتى شبه واحد
مجموعه ماتقدرش تغلب دوله
هو فى مجموعه تقدر تغلب دوله ؟؟ ارهابيين يغلبوا دوله ؟ جماعه تهدم دوله ؟
محدش هايقدر يهدم مصر
======
** الاستاذ عمرو اديب بيسأل حضرتك ايه ناقصكم ومحتاجين ايه؟
طب تصدقي لو قولتلك بيسألونا عاوزين ايه
الدكاتره بتيجي تكشف عليا وبتعالجنى هنا
مش دكاتره .. دا كام واحد مع بعض
اللى بيقيس الضغط واللى جابلى علاج
بنفطر عادى وبنتغدى فى معادنا
وفى العشا بيبعتوا مع العشا الشيبسي والعصير وانا فى بيتى مش بجيب شيبسى وعصير مع الاكل 
:D
:D
( ختم اللقاء بضحكه جميله بحسده عليها فى ظل الظروف اللى هما فيها )
================
ازمه زيها زى مليون ازمه شافتها البلد
وربنا قادر على حل كل ازمه .. ربنا قادر على كل شىء 
:)
:)
E.E
Eslam Elbahrawy