تحليل - كفر دلهاب بعد 7 حلقات - ملاحظات عابره و نصيحه مهمه جدا لكل من يشاهد المسلسل
كفر دلهاب وملاحظات بعد مرور 7 حلقات !
ونصيحه وجب توجيهها لكم
==========
وعتدكم انى مش هاعلق على المسلسل بالايجاب او السلب الا بعد انتهاءه
عشان اشوف خرجنا بفكره كويسه
ولا رسخ فى دماغ الناس مفاهيم خاطئه
---------
ولكن عندى ملاحظات
ولما اقول ملاحظات مش معناه اتهام المسلسل بشيء
لكن حاجات توقفت امامها
1- مازلت بحاول اوصل للاسقاط السياسي للمسلسل هل هو اسقاط عن زمن ماضى ام زمن حالى .. لان مش طبيعى انى اشوف مسلسل بيحكى مشكلة قريه مع الجن .. كل حلقه يتكلموا عن الفقر و شيخ الغفر الحرامى !
خصوصا ان كاتب المسلسل عمرو سمير عاطف له توجهاته السياسيه المؤيده ل 25 يناير !
استوقتنى جمله فى الحلقه الرابعه
الناس لو جاعت .. النار اللى هاتحرق القريه .. هاتبقى اكبر من نار اى شيطان !
========
2- واقف عند فكرة تصميم ملابس الشخصيات
ليه ملابس أعالى ( علية ) القوم اللى بيحكموا القريه ولهم تقدير
زى شيخ الغفر والطبيب .. كلها اسود فى اسود !
حتى ملابس الطبيب الاسود فى اسود
اللى هو بيمثل الخير وبيحارب الشر .. غير موفقه
اعتقد ان تصميم الملابس كان محتاج لون ابيض او اخضر ليدل على الخير والسلام ومازلت ابحث هل كان تاريخيا الرداء الرسمى للطبيب هو اسود تماما !
=========
3- تعجبت من جمله عابره قالها الساحر الدجال
لما قابله يوسف الشريف وقاله انت الساحر
فرد الساحر وقال انا عبد من عباد الله عايش بأفضال ونعم الله عليا
استغربت تركيبة المشهد ..الساحر اللى لبسه مليان جماجم ومعروف انه بيعمل اعمال وبيستخدم الدم .. وبيقول عايش بفضل نعمة ربنا عليا !
وكأنه رجل خير !
=========
4- حتى الان مازال الصراع فى المسلسل
بين الجن .. وبين الدجال بالدجل بتاعه وبين الطبيب بالعلم بتاعه
حتى الان لم ارى اى مظاهر لاستخدام الدين لمحاربة الظاهره بالقراّن والاساليب الروحانيه
لعلها تظهر فى الحلقات القادمه !
=========
5- بعض المحللين فى المواقع ذكر ان اللغه التى يتكلم بها الجن الموجود فى القريه هى اللغه التركيه !!!
سأنتظر لنهاية المسلسل لاعلم لماذا اللغه التركيه تحديدا وليست العربيه !
ولعل هذا يكون اسقاط سياسى او ماشابه
===========
6- حتى الان لم يظهر اسم ليوسف الشريف فى المسلسل
.. فقط لقب الطبيب
وبرضو بحاول اوصل لمغزى او هدف عدم وجود اسم
========
7- يوسف الشريف في احدث تصريح له منذ ساعات
قال انا صاحب فكرة المسلسل
وفي دماغي افكار كتير
وفكرة المسلسل موجوده عندي من وقت طويل جدا
بس حيث ان دلووووقتي وقتها وهو الوقت المناسب لطرحها .
مافهمتش يعني ايه الوقت المناسب لطرحها !
---------
8- بقى اخر شىء وهو الاهم
خد كلامى وارميه للبحر
اتهكم واضحك وهزر
بس حاول تديله اهميه ولو 1%
زى ما نصحتكم وانتوا بتتفرجوا على فيلم الفيل الازرق
وزى ما نصحتكم وانتوا بتتفرجوا على مسلسل الكبريت الاحمر
اللى اثبت لكم بعد عرضه بفتره بإعتراف مؤلفه انه استخدم طلاسم سحر اسووود حقيقي و اسماء جن حقيقيه !
ارجوكم اتفرجوا براحتكم
لكن .. ماتسلمش عقلك بشكل كامل للموسيقي او الاصوات
ماتركزش جدا وانت بتتفرج حاول تقطع تركيزك وبص للموبايل او بص لحاجه تانيه
ماتحاولش تعيد على مسامعك الكلمات اللى بتتقال بلغه غريبه ومش مفهومه
معلش خدنى على اد عقلى 
:)
:)
==========
** تحديث بسيط .. في حلقة اليوم واضح انه تم ذكر اسم الطبيب
كتابة البوست كانت قبل مشاهدة اخر حلقه
الديكتاتور
رئيس جمهورية نفسه
E.E
Eslam Elbahrawy
