تحليل - كفر دلهاب والمؤلف عمرو سمير عاطف - القصه مش قصة عفاريت - اسقاطات سياسيه واهواء شخصيه - الجزء الثانى
كفر دلهاب وعمرو سمير عاطف
القصه مش قصة عفاريت ( 2 )
** خيال الاسقاط ام اسقاط خيالى !
ومعنى كلمة ( دلهـــــــــــــــاب )
==========
المشهد دا فى الحلقه الثامنه توقفت عنده جدا
ماقدرتش ابعد دماغى انها تستبعد اى اسقاط سياسيى
مممم
شيخ الغفر بيكلم الاتنين اللى اغتصبوا البنت وقتلوها
وبيقولهم ماتخافوش
محدش هايكشفنا
انا شيخ الغفر
وانت ابن اغنى واحد فى الكفر
وانت ابن قاضي الكفر
اللى مر قصاد عيني كان فكرة الاسقاط لعصر مبارك
شيخ الغفر = مبارك والداخليه
ابن اغنى واحد فى مصر = المال المشبوه ( احمد عز )
ابن القاضي = السلطه القضائيه واللى احنا عارفين ان كتير من مؤيدي 25 يناير دايما بيشككوا فيها !
=========
وعلى فكره
فانز السيناريست عمرو سمير عاطف نفسهم بيفكروا كده
وشايفين ان المسلسل كله اسقاطات
يعنى تحليلي مش قائم على معارضه من اجل المعارضه
ولو كان الاستاذ عمرو فتح للفانز بتوعه فرصة انهم يحللوا اى اسقاطات
فأتمنى الفرصه تتاح ليا
واحد من فانز الاستاذ عمرو قاله ياريت كنت سميت البنت اللى اتقتلت رابعه بدل ما تسميها ريحانه !
فى اعتقاد من المشاهد ان عمرو سمير عاطف عامل اسقاط على فترة الاخوان واللى حصل معاهم فى فض اعتصام رابعه
لكن ....
لو طلبتوا منى انا تحليل اسقاط سياسي للمشاهد حتى وان كان مفيش اسقاط اصلا والله اعلم
ولو طلبتوا منى اغمض عينى و اركب المشاهد على الحياه اللى بنعيشها
حتى لو قولتوا شغل ( خيالك ) من باب نظرية المؤامره 
:)
:)
هاقولكم :
تعالوا نتكلم عن الشخصيات الاول
1- انا شايف ان المسلسل بيجسد عصر مبارك وما بعده
2- شايف ان شيخ الغفر بيمثل الاتنين مبارك والداخليه
3- ابن القاضي اسقاط للسلطه القضائيه اللى قالوا ان مبارك كان متحكم فيها
4- ابن اغنى واحد فى الكفر - اسقاط للفساد المالى وسيطرة المال
5- ريحانه اللى اتقتلت .. مش قادر ابعد خيالى انه يشوفها انها بتمثل مصر
6- هند اللى بتحاول تتجسد روح ريحانه فى جسمها عشان تجيب حقها
اعتقد انها بتمثل الشعب .. اللى بتتجسد مصر فيه عشان يجيب حقها
7- الطبيب اللى بيدور على حق ريحانه
اعتقد انه بيمثل صوت الشعب ايا كان واحد سياسي او حد بيحرك الاحداث
لكنه الشخص اللى بيقود الثوره !
8- الطفله الصغيره اللى بترسم وبتشوف اللى هايحصل
اتقد المقصود بيه الشباب .. المستقبل.. اللى شايفين حال البلد بشكل قاتم اللون وعاوزين يغيروه
9- اللى خلانى اقول ان شيخ الغفر بيمثل الداخليه
ان ابنه ( احمد سعيد عبد الغنى ) نفسه يساعد الطبيب انه يلاقى القاتل
وفى نفس الوقت بيحب هند
بس مش قادر يتكلم لان ابوه اقوى منه
وكأن دول ضباط الداخليه اللى بنحاول نفهم انهم ماكانوش راضيين فى فترة حكم مبارك
لكن ماكانوش قادرين يتكلموا !
===========
مجرد مممم مجرد تركيب صور على مشاهد
صح او غلط معرفش
مفيش اتهام لحد ولا اتهام للمسلسل ولا للسيناريست
اللى لو صحت اى واحده من الاسقاطات دول هاحترم جدا فكره رغم انى هابقى مش موافق عليه
لكن حاولت اتسلى يعنى
ماتعصبش نفسك وانت بتقرا البوست وتدخل فى مشاحنات وكلام يزعلك
لو انت من المتهكمين ..اعتبر نفسك قريت بوست كوميدي يا سيدى
========
اخيرا ملحوظتين فى السريع
1- كلمة دلهاب - هى اسم من احد اسماء الجن
2- هشام عبد الله الممثل الفاشل اللى بيقدم برنامج فى قناة الشرق
خصص حلقه اول امبارح مدتها 35 دقيقه عشان يشكر يوسف الشريف
لان مسلسله بيقول اسقاطات سياسيه ضد الظلم والفساد اللى حاصل حاليا فى مصر !
3- كفر دلهاب تانى مسلسل ليوسف الشريف يتضمن اسمه احد اسماء الجن والشياطين بعد المسلسل السابق ( لعبة ابليس )
===========
قد يكون كلامى مش مبلوع لبعض الناس او شايفين فيه لا منطقيه شويه
لكن احنا فى 2017 مابنتعاملش مع اعمال فنيه منفصله عن واقعنا
الفن مراّة مجتمع وبيجسد حاله بنعيشها
بدليل ان المنطقه وما تعيشه من ظروف بقالها سنين
اصبح هو دا اصل الافكار الفنيه كلها
======
وللحديث بقيه برضووو
والمره الجايه صور مهمه
صور مش من المسلسل !!
E.E
Eslam Elbahrawy
