بالصور - ماذا تعرف عن البطل احمد فضل رفاعي - بطل ملحمة قطار سمالوط الذي ألقي بنفسه فى النار لحماية ارواح المصريين
ويقولك خافوا من داعش هههههههه
ارفع ايدك يا جدع انت وهو للبطل عم احمد
مصر فيها الخير ليوم الدين ... ارض الرجال بمعنى الكلمه
=========
نماذج غريبه
ممكن الصدفه تخليك تسمع عنها
بتفرح لما تشوفها
لكن بتحزن انها مش بتاخد حقها
فى الصوره قصادك ... عم احمد
عم احمد بعد العلاج .. لان عم احمد قبل العلاج كان عباره عن جسد مشوه من الحروق
فى مايو 2016 .. محطة قطار فى سمالوط
القطار فيه 29 عربيه .. كل عربيه متحمله 4 طن سولار
مكتب التحويله بتاع سمالوط .. قاعد فيه عم احمد
بيبص لقي القطر فى عربيه منه بتولع
ولو النار مسكت فى ال 29 عربيه .. المنطقه السكنيه المحيطه بالسكان اللى فيها .. كلهم هايبقى قطع نار وكله هايتحرق ويموت فى ساعتها وكادت تبقى من اكبر كوارث التاريخ لان المحطه فى وسط منطقه سكنيه
عم احمد جرى على عربية القطر المولعه .. نام تحت القطر
حاول يفصل العربيات عن بعض
العربيه اللى مولعه .. خرج منها نار مسكت فى جسم عم احمد
طلع من تحت القطر وهو مولع .. عاوز يطفى نفسه
جنب قضيب القطر فى زرع .. الزرع دا شووووك
رمى نفسه وسط الشوك وقعد يتمرمغ عشان يطفى نفسه
معدى واحد .. راح قالع جلابيته وقعد يطفى عم احمد اللى النار مسكت فيه بالكامل
الراجل قدر يطفى عم احمد .. جثه لانسان محروق بنسبة حروق وصلت 50%
وكمان جسم مليان شوك
يسكت ؟.... لا
عم احمد بعد الراجل ما طفى النار من عليه
قام جرى على القطر تانى عشان لو انفجرت العربيات هايموت الاف من الناس
ساعد معاه سواق القطر .. وفصلوا العربيات .. واتبقى العربيه المشتعله
الجرار لازق فيه العربيه المشتعله
صمم عم احمد يسوق الجرار بالعربيه المشتعله لمسافه بعيد عن باقى عربيات السولار
ولما وصل لحته معينه وقف بالجرار والعربيه اللى مولعه
لما سألوا عم احمد على الهوا فى لقاء تلفزيونى بعدها
اشمعنى وقفت العربيه اللى بتولع فى المكان دا تحديدا
رد قال .. عندنا فى الصعيد .. بيقولوا كل واحد يشيل شيلته
اللى محدش يعرفه ان بيتي لازق فى شريط القطر
فأنا مشيت بالجرار اللى مولع لحد ما وقفته قصاد بيتى
عشان لو انفجر .. اهلى بيتي بس اللى يتأذوا !!!!!!!!!!!!!
هو فى كده ؟؟.... هو فى كده بجد فى الزمن دا
الزمن اللى راجل بشنبات بيشوف واحده بيتحرشوا بيها ويسكت
الزمن اللى فيه عيل لسه بياخد مصروف بيشتم بلده وجيشها
الزمن اللى فيه بنات بقت تسب الدين وتشرب مخدرات وتقول حريه
عم احمد اتحط فى التأمين الصحى
لكن الريس السيسي لما عرف بالواقعه ..
بعد 3 ايام امر بنقله لمستشفي القوات المسلحه
واتعالج ورجع لشبه شكله الطبيعي
ولما قابله وفد رسمي عشان يشكره وقالوله طلباتك ايه
اتكسف .. قالهم ماعنديش عيل متعلم اقولكم شوفوله وظيفه
بس هاتقل علييييكم واقولكم والنبى عاوز شقه انا وعيالى !!
الغلابه اللى بجد ...
فى ناس بتصح الصبح تكسب الوفات اول ما تفتح عينها
وتكتب على الفيس تشتكى الفقر وتشتم البلد واللى فيها
وراجل تانى رمى نفسه فى النار
وحط النار قصاد بيته اللى فيه مراته وعياله
ومكسوف وهو بيطلب شقه !
سبحانك يارب
بتحط فى قلوب الغلابه رضا وقناعه ماتتعوضش بملايين
بلد الابطال
الصعيد بلد الرجاله
شكرا عم احمد
E.E
Eslam Elbahrawy
رابط المنشور على الفيس بوك
اضغط هنا
