موقفى كمصرى مما يحدث فى غزه
بين عدم الخوف من قول الحقيقه وبين مشاهد جثث شهداء مصر التى لا تغيب عن عينى
حماس تجنى الثمار
بسم الله الرحمن الرحيم
طبعا حضراتكم عارفين ان اغلب كتاباتى هنا فى المدونه بتكون بالعاميه
وقليلا لما بكتب بالفصحى .. دا بسبب انى عاوزكم تحسوا اننا بنتناقش وكأننا فى قعدة واحدة
مش مجرد كلام مقالات بيتكتب وانتوا بتقروه
بالنسبه لما يحدث لغزه .. انا كان ليا رأى شخصى كإسلام البحراوى
مجرد مواطن شايف افواه خبيثه بتقول فين الجيش المصرى ومش بيتدخل ليه
وحبيت اقولكم انا بفكر ازاى وشايف الموقف ازاى
انا لخصت كلامى فى 3 بوستات على الفيس بوك
وانا هاحطلكم البوستات كما هى عشان تفهموا انا شايف الموقف ازاى
** البوست الاول
رابط البوست
معلش يا غزه والله كان بودى لكن ..:
عندى ناس بتموت فى سيناء
عندى ناس بتموت فى اسوان
عندى ناس بتتفر جوا ابلد
عندى ناس بتدخلى مخدرات
عندى ناس بتدخلى ترامادول
عندى ناس ارهابيين عايشين فى وسطينا
عندى بلد .. عاوزين يوقعوها
كان بودنا والله بس معلش بقى
قالك اللى يحتاجه البيت يحرم على الجامع
وانا عندى اللى تحتاجه مصر يحرم على اى حد واى حاجه
وبعدين ما انتوا ماشاء الله عندكم حماس
دى الناس دى اللى قالتلنا انهم هايكتسحوا الحدود المصرية فى كام ساعه
خليهم يتحركوا ويكتسحوا الحدود الاسرائيليه شويه !
لو على العروبه .. ما اخدناش منها الا قتل ولادنا وهما بيفطروا فى رمضان
ولو على القدس .. للبيت رب يحميه
ولو على حماس..؟ يبقى يغور كل حاجة ليها علاقه بيهم !
الى كل غزاتوى حمساوى فلسطينى
والنبى قبل ما تطالب جيش مصر يتحرك عشانك
روح كلم الحمساويه الاول قولهم يوقفوا الاتفاق بينهم وبين الاسرائيليين
اصل يا عزيزى مفيش صاروخ بينضرب من حماس الا وبتكون اسرائيل عارفه مكانه
وكالعادة هو هو نفس الفيلم والاخراج
صاروخ حمساوى يكسر شباك ولا يقع فى بلاعه ويعمل اصابه لكام قطة ولا عصفوره معديه
يترد عليه بكام صاروخ اسرائيلى
اللى يبيعوا ارضهم ويتحدوا مع اليهود
مايلزمونيش فى حاجه
روح لحماس ...
خليها تنفعك
وماتقوليش حماس مش هيا فلسطين
لان محدش منكم فتح بوءه وحماس بتقتل فى ولادنا
وكانت كل فلسطين ساكته
لو كانت حماس بتحكمكم ومع ذلك بتقولوا انها مش كل فلسطين
انا اسف..الوضع عندى مختلف
انا الجندى المصرى عندى هو كل شـــــــــــىء وكل مصر !
E.E
ESlam Elbahrawy
** البوست الثانى
رابط البوست
فاكرين
فاكرين لما قولتلكم انا مش جبان ومابقعدش جنب الحيط وقت الجد
فاكرين لما قولتلكم انا مش بمسك العصايه من النص
فاكرين لما قولتلكم انا مابحبش اعمل عبيط وماقولش رأيى فى حاجة انا حاسس انها هاتخسرنى حد من هنا ولا بنت من هنا ولا كام لايك من هنا
انا مش كــــــــــــــــــده
انا رأيى طالع من دماغى وبس
ولا هاخاف ان عدد اللايكات يقل
ولا هاكون حابب اقول رأى مايع عشان ارضى الطرفين
ولا هاخاف صفحتى عددها يقل
ولا عمرى هاعمل عبيط واسكت وماعلقش واقول رأى واضح
بعد بوست فلسطين فى ناس زعلانه
وفى ناس بتشتم
وفى ناس بتسيب الصفحه
عاوز اقول لحضراتكم ولا هايفرق معايا
كنت خوفت ايام النكسه لما كان الكل بيرقصلها وانا بشتم فيها
انا معنديش غير بلدى
اللى عاملى فيها حنين يروح يشيل سلاح ويروح فلسطين
الجهاد مش من ورا شاشة الكمبيوتر
وحماس وكتائب عز الدين القسام اللى
فتحوا السجون المصريه .. عمرى ما هاقول انى معاهم او بساندهم
وفلسطين اللى بتقولوا مش كلها حماس؟محدش فيهم فتح بوءه وقال لحماس عيب لما قتلوا المصريين
العروض العسكريه فى قلب فلسطين كانت لحماس وعز الدين القسام وهما رافعين
شعارات رابعه وصور محمد مرسى والاخوان ومفيش فلسطينى طلع قالهم غلط
انا ليا اصدقاء من فلسطين على فكره
وبحترمهم والله على فكره
بس مش هاحب حد اكتر من بلدى وجيش بلدى
مناظر الاطفال فى فلسطين بتوجع؟
اه بتوجع والله يرحمهم برحمته ويشفيهم
لكن هل حد اتوجع على الضابط اللى اتفجر مخه قصاد جامعة القاهرة؟
محدش شال همه غيرنا احنا .. مش حد
تانى
مناظر الاطفال صعبانه عليا مفيش شك
اصلى بنى ادم وانسان
لكن يصعب عليا حاجة
وانى اطبل حاجة تانية
وانى اقول كلمتين من ورا الشاشه واطالب الجيش يتدخل دى حاجة تانيه
وانى اكون ماكملتش 15 سنه وكل اللى اعرفه عن التاريخ ان مصر دخلت كاس
العالم مرتين ورايح اتكلم واشتم فى الناس واقول فلسطين والعروبه والدم دى حاجه تانية !
انا مابعرفش الملاوعه
انا مابعرفش اركن جنب الحيط واقول موقف وهايعدى وبلاش اقول رأيى عشان عدد
الفريندز مايقلش
انا مابعرفش اسكت؟ واستنى اشوف الكفه هاترسى على ايه؟ وبعدها اطلع اتكلم واقول انا ماكنتش راضى اتكلم بس انا كان دا رأيى !!!!!!!!!!
مش مشكلتى انكم بتتعاملوا بوشين .. وش فى الحقيقه ووش على الفيس عشان خاطر اللايكات والكومنتات ومش مشكلتى انى بتعامل بمزاجى ودماغى
ومش بيهمنى الفيس وكلامه وصفحاته
كلمتين بس حبيت اوضهحم
عشان الناس اللى داخله تقولى اصل اليهود نجحوا فى اللى عايزينه
اليهود نجحوا يكرهونا فى بعض اليهود نجحوا يخلوك تتخلى عن القضية
نجحوووووا فى ايه؟ انتوا بتصبروا نفسكم ولا ايه؟
انتوا متقسمين من غير حاجه
هوا مين اللى بيخرب مصر بقاله 3 سنين؟ مش قطر ؟
هوا مين اللى عمل غزو الكويت؟ مش العراق
هو مين اللى قتل جنود مصر فى سيناء؟ مش حماس الفلسطينيه؟
هوا مين ومين ومين ومين؟ بتضحكوا على نفسكم ليه
حتى ان كان كل دول بيحركهم صهاينه ولكن هما قبلوا ان اليهود يحركوهم ودى مش مشكلتى
لو كان على الاطفال ؟ الله يرحمهم ويشفى المصاب منهم
وكإنسان بتمنى ان ربنا يخفف عنهم الامهم
انما لو على الجهاد؟ كنت اسمع ان فى
اخوان وداعش وحاجات كده عالقدس
رايحين شهداء بالملايين..روحوا صفحاتهم
وبروفايلاتهم بقى وطالبوهم بالحرب من
اجل غزه.. شيلوا الجيش المصرى من الموضوع
اللى مختلف؟ اهلا وسهلا انا مش نبى ولا رسول ولا كلامى قراّن
بس دا رأيى الشخصى على صفحتى الشخصية
مات الكلام
ومش فارق اللايكات تقل ولا تزيد
اصل الضمير مش بعدد الاعجابات
الضمير يوم ما تخالفه عشان ترضى
اكونتات فيس بوك؟ .. اعرف ان الضمير
مات
E.E
Eslam Elbahrawy
** البوست التالت
رابط البوست
اصل انتوا مش فاهمين ان المشكله عندكم مش عندنا
مش احنا جيشنا جيش نوال
مش انتوا قولتوا كده
مش احنا جيشنا جيش مكرونه
مش انتوا قولتوا كده
طيب بتستنجدوا بجيش المكرونه ليه بقي.. ايه عاوزينا نيجي ومعانا رشاشات وفيها رز بالخلطه ولا دبابات فيها قذائف سباجيتي
سيبوا جيش المكرونه بيصون بلده وارضه وعرض ولاده
واستنجدوا بجيش قطر او جيش اردوغان
دول اقربلكم مننا
E.E
Eslam Elbahrawy