من يوقف وائل الابراشى قبل ان يحرق مصر؟
حلقة الامس اعادة لسيناريو الفتنه الطائفيه
اعلام الدجال يشعل الفتيل مره اخرى
الحريقه الجايه فى صعيد مصر
واضح ان التخطيط جارى لهذا الحدث
ولكن اوعدكم .. اقسم بالله كمواطن دا هايكون اول بلاغ رسمى ضد وائل الابراشى
للتحريض على الفتنه الطائفيه .. لان حلقة امبارح ما هى الا اعادة رسم مخطط اسقاط الشرطه عن طريق الفتنه الطائفيه
** بصوا بقى انا ليا اصدقاء كتير مسيحيين .. وعارفين انى مش من اللى بيطلعوا يكفروا الناس وبيفكر بالتفكير بتاع مسلم ومسيحى والكلام دا
انا واحد بعامل الناس على اساس معاملتهم مش على اساس الدين لان دا فى الاخر بتاع ربنا يوم الحساب .. فالكلام اللى هاقوله انا متأكد ان اصدقائى المسيحيين مش هاياخدوه بشكل متحيز منى وهايفهموا الكلام انى بتكلم فى مصلحه عامه
** لو البلد دى فيها حد بيخاف عليها بجد .. لازم وائل الابراشى يتحقق معاه فورا ويتم وقف البرنامج ويتم التحقيق معاه بتهمة التحريض على فتنه طائفيه
** القصه ببساطه عن اختفاء سيده مسيحيه فى قريه فى الصعيد .. والمسيحيين بيقولوا انها اتخطفت من شاب مسلم .. هو هو نفس السيناريو اللى حرق البلد قبل كده وبيتكرر المره دى عشان يحرق البلد تانى !
** مدير الامن طلع قال ان الناس اهل السيده المختفيه راحوا عند القسم وكسروا العربيات بتاعت الشرطه واشتبكوا مع المجندين وفى اصابات !
وبيقول ان القصة مش قصة خطف ومسلم ومسيحى..ومدير الامن على الهواء قال اهل السيده عارفين القصه كامله .. بس انا احتراما ليهم مش هاقول سبب الاختفاء..
فواضح ان سيادة اللواء بيلمح انها هربانه مش مخطوفه وعادى ياما شوفنا مسلمه بتهرب مع مسيحى ومسيحى بيهرب مع مسلمه .. بدليل ان اللى بيقولوا انه خطف السيده دى .. شاب مسلم صدددددددديق زوج السيده ودائم التردد على البيت عندهم بحكم الصداقه ..!
** لحد هنا ممكن تقول مدير الامن بيشتغلنا .. مفيش مشكله..
لكن المشكله فى التقرير اللى عرضه الاعلامى الفاشل اللى بيقود حرب خفيه لاشعال البلد ..
التقرير المعروض بيقول الاّتى:
1- جايب شهادات من اهل قررريه كامله .. بصوا بقى بالعقل هه؟
بيقولك فى التقرير..جايب اهل القريه كلهم..بيقولوا ان الشرطه فى ساعتين بليل .. دخلوا القريه كلها..كسروها..كسروا البيوت..جلدوا الاباء والامهات والاطفال .. كسروا العربيات واعتقلوا شباب القريه !
شخصيا مستعد اصدق دا لو بشوف الجزء الرابع من فيلم The Expendables بتاع سلفستر .. لان ماتقنعنيش ان قوه طالعه من قسم .. هاتروح بلد كامله..تضرب كل الستات والرجاله والاطفال وتجلدهم وتكسر البيوت وتخلع الابواب الحديد فى البيوت وبعدين تكسر العربيات وبعدين كمان يقتلوا المواشى اللى فى الزرايب..
دى حرب اباده دى ولا ايه يا خويا ؟؟؟؟؟؟؟؟؟
2- سيبك برضو من اللى فات .. فى جهات تحقق فيه ولازم نعرف مين من الشرطه اعتدى او ضرب او تجاوز لان مفيش حد ملايكه و دا طبيعى .. لكن الفكره كللها نعقل الكلام هل هو منطقى ولا اوفر شويه
لكن اللى بطالب انه يتم التحقيق فيه مع وائل الابراشى هو التقرير الفاضح اللى تم عرضه ..
دا جنون وتخلف وغباء
بصوا حضراتك ..
فى الصوره رقم 1 ..
الراجل الفاضل ( زوج السيده ) دا بيقول انا بطالب السيسي ينزل يدورلى على الست المخطوفه وبنعطى مهله للحكومه اما تجيب الست دى او نروح القريه بتاعت الشاب المسلم ونعملكم فتنه طائفيه كبرى محدش هايقدر يلمها ( وانا اعتقد انه متحفظ البوءين دول )
2- فى الصوره رقم 2 .. الحج دا بيقولك هانروح قرية الواد المسلم نكسر ونحرق ونخرب ونضرب ..باللفظ والنص كده
3- فى الصوره رقم 3 .. لما بنت السيده المختفيه .. بنت ماتكملش 13 سنه..تطلع وتقول السيسي يدور على امنا..ولاحظوا تكرار مطالبه السيسي !! وان الحكومة لو مارجعتش امنا هانروح القريه ونعمل فتنه طائفيه ( نفس البوءين ) اسلوب التهديد !
وقالت كلمه غريبه اوى :
انا بنت صغيره معرفش حاجه بس مش ذنبى انى مسيحيه بيضطهدونى !!
غريب الكلام صح ..؟
4- فى الصوره رقم 4 .. لما وووووووولد طفل مايكملش 8 او 9 سنين.. يقول للمذيع انا امى لو مارجعتش هانروح القريه بتاعت الواد اللى خطف ماما وهانمووته !!
دا اسمه ااااااااااااااااايه؟؟ وبالمناسبه ..هما بيقولوا كده.. يعنى مش بيقولوا مثلا هانروح نقتل او نولع؟ لا .. بيقولوا هانعمل فتنه طائفيه !!
5- حاجه غررريبه بقى لاحظتها وانا بعيد الفيديو اكتر من مره ..
فى شابين او تلاته كان كلامهم فى التقرير كالتالى:
انا كنت نايم ولقيت بتوع امن الدوله دخلوا كسروا الباب وخدونى وضربونى
( يا ترى الشاب الغلبان دا عرف منين ان دول امن دوله؟ ليه ماقالش حكومه او شرطه )
- شاب تانى يقولك اصلهم دخلوا كسروا البيت وقالولنا وهما بيضربونا.. انتوا بتتحدوا امن الدوله يا ولاد الكلب؟؟؟
الله؟ هو مال امن الدوله .. انتوا روحتوا قصاد قسم الشرطه وحصل اللى حصل..ايه يخلى عسكرى بيضربك يقولك بتتحدوا امن الدوله ؟؟
شخصيا مش بالع الموضوع خصوصا ان كلمة امن الدوله اتكررت فى غير موضعها
6- حد هايقولى ووائل الابراشى ماله ..
اقولك .. انه لو ماكانش له دور فى عرض القضيه بشكل طائفى..
فهو مذيع بيوصله الفيديوهات دى وشاف الكلام دا
وكان يجب منع عرضها حرصا على عدم اثارة الرأى العام
بالضبط زى ماتشات الكوره فى اوروبا.. مش بتلاحظوا ان لما بيحصل شغب من الجماهير فى المدرجات المخرج بيركز على الملعب ومش بيجيب الشغب؟ عشان مايحصلش اثاره وفتنه بين الجمهورين وهما بيتفرجوا على الماتش
تقوم حضرتك رايح بجلالة قدرك تعرض فيديو لناس بتقول هانروح نعمل فتنه طائفيه؟
** السؤال هنا .. الطفله اللى 13 سنه دى عرفت مصطلح فتنه طائفيه ازاى؟
الطفل اللى ماكملش خمس سنين دا؟ عرف مصطلح فتنه طائفيه ازاى؟
الاهالى اللى قالولك الفجر الحكومه دخلت؟ فجأه قريه فى الصعيد بتنام من المغرب؟ فجأه كانت سهرانه وشافوا الحكومة وهما بيكسروا ويحرقوا ويشتموا ويجلدوا ويقلعوا الحريم ويضربوا الرجاله..كله دا فى قريه كامله فى ساعتين؟
دا لو شرطة كلها انسان اّلى مش هاتعمل كده !
** مين المستفيد من كل دا ؟
مين المستفيد من كل دا؟
لما زوج السيده يطلع يتكلم مع وائل الابراشى فى المكالمه ويبدأ كلامه ان المقصود من الاختفاء مالوش علاقه بفتنه طائفيه وان اهل القريه المسلمين بيتعاملوا كويس مع اهل القريه المجاوره المسيحيين ..
ثم يبدأ وائل يقوله .. اهم حاجه استنى القانون يجيب حقك اياااك تروح تقتلهم.. اياك تروح تعمل فتنه.. الموضوع مش مسلم ومسيحى بقى.. انا عارف يا حج ان دا عرض وشرف بس خليك هادى ..! ..ويفضل يسخن فى الراجل بشكل غير مباشر
لحد ما خلى الراجل وهو بيقفل المكالمه يغير كلاااامه ويسخن ويقوله دا المسلمين بيقطعولنا الانجيل ويرموه قصادنا ..وفجأه اتقلبت المكالمه !
** فى حد بيشعل الفتيل .. فى حد بيسخن الناس دى .. فى حد استغل الواقعه وحفظ الناس دى كلام وفهمهم ان الكلام دا لو اتقال الحكومه هاترجع الست بسرعه
** بصرخ بقالى شهور قد تصل لاكثر من عام
وبقول الرقابه يا ريس
الافلام والبرامج بتولع فى البلد يا ريس
والله لو مليون قناة سويس ولو مليون مشروع قومى
لو لم يتم منع كل هذه القنابل الموقوته ؟ البلد هاتقع
** هافكركم .. قبل حلقه الابراشى محدش عرف حاجه عن الموضوع..استنوا بقى بعد حلقة امبارح دى .. وشوفوا هايحصل ايه...
رابط الحلقه فى اول كومنت
اسف للاطاله ...
واقسم بالله العظيم انا ما كنت اعرف مين مسيحى ومين مسلم..مين اتخطف؟ واتخطف ليه؟ انا قاعد بستمع زيى زيكم ..
وارجوكم اى حد معارضنى..ياريت تسيب تعليقك بعد ما تشوف الحلقه ..
اتفرررج واسمع كلام الناس.. ناس طالعه على الهوا صوت وصوره بتقولك هانروح نولع ونعمل فتنه ..دا اعتراف على الهوا بجريمه يا جماعه !
انا مش فارق معايا الست مخطوفه ولا هربانه عشان بتحب
ومش فارق هى مسيحيه والواد مسلم ولا هى مسلمه والواد مسيحى
لان ولا دا هايقلل او يزود من المسلمين او الاسلام
ولا يقلل او يزود من المسيحيين او المسيحيه
انا بتكلم فى قضيه ممكن تحرق بلد
بغض النظر مين غلطان او ومين مش غلطان
انا بتكلم على عرض كلام على التلفزيون ممكن يحرق بلد كامله
حتى لو ناس يتقوله بعصبيه بسبب الحاله اللى هما فيها..لا يصح عرض الكلام دا
وبالمناسبه عارف ان بعد دا كله هاتشتم اما من مسلم بيقولى ان بتدافع عن مسيحيين او من مسيحى بيقولى انت متحيز للمسلمين .. وكان ممكن اعمل زى غيرى واشوف واسكت خوفا من تعليقاتكم..بس انا مش بخاف الا من ربنا
عالاقل اكون شوفت حاجه غلط واتكلمت فيها
وياريت اى معلومه او فيديو او صوره تثبت تعدى الشرطه او تثبت ان كلامى غلط ياريت حد يبعتهالى عشان اعتذر عن معلوماتى الغلط واقول ان الحقيقه كذا وكذا
وافتكروا ان فى النهايه دى مجرد وجه نظر قد تصيب وقد تخطىء
شكرا واسف للاطاله.. وربنا يحمي البلد دى من النار اللى بيحضرلها الخونه عشان تحرقنا كلنا !
E>E
Eslam Elbahrawy
