شريف عامر يناقش موضوع المساكنه وتطبيقه فى مصر - جارى أمركة مجتمعنا - اقروا على الاخلاق الفاتحه
يا اخى .. العدو الصهيونى دا
رغم قذارته الان انه بارع فى القذاره دى
شوف الحصار المعمول علينا يا جدع .. دا احنا مربوطين ومتظبطين تظبيطه صح
برامج برامج برامج برامج
هبه قطب تقولك ازاى تمارس الجنس .. وطونى خليفه يستضيف شاكيرا
وريهام سعيد تجيب العيال اللى بتتحول لقطه .. ووائل الابراشى يجيب صافيناز
سيبك بقى من كل دا
يحدث فى مصر .. شريف عامر .. حلقة امبارح
جايب شاب كيوت .. وبنوته سو كيوت وبيناقشوا قضيتهم
قضية ( تحليل السكن الحرام )
لالا اسف دا ماكانش اسم القضيه فى الحلقه
الحلقه استخدمت الاسم الامريكانى ( المساكنه )
المساكنه بالمفهوم الامريكانى..هو اللى انتم بتشوفوه فى امريكا
ان البنت والولد بعد 16 سنه لازم يسيبوا بيوتهم ويشوفوا حياتهم .. ولان مش معاهم فلوس .. بيشوفوا شقه اوضتين ويقسموا الايجار مع بعض ويعيشوا مع بعض ويتقاسموا السكن رغم انهم اغراب عن بعض
الشاب اليكوت والبنوته السو كيوت بتوع امبارح عايشين مع بعض
وبيناقشوا القضيه ومش عاجبهم المجتمع المتخلف ( اللى هوا احنا )
لان احنا ازاى مش قادرين نبقى متفتحين عشان ولد وبنت اغراب يعيشوا مع بعض فى نفس الشقه .. ازاى تفكيرنا متخلف وكله جنس وقرف وبنقول انه ماينفعش !
اولا حابب اقول للكيوتين الحلوين ..
دا حرام شرعا ودى اسمها خلوه غير شرعيه
ثانيا ..
حاولت اقنع نفسى انى حتى شاب مش بسيب سجادة الصلاه بس عايش فى بيت وانا عازب ومعايا واحده عايشه معايا ونايمه معايا فى نفس البيت والشيطان هايبقى واخد اجازه
ثالثا .. تضمنى منين شريكك فى السكن انه يكون كويس؟ مش يمكن خمورجى ولا مدمن ولا قتال قتله
رابعا ..
هو فى الصيف حضرتك هاتقعدى قصاده ازاى ...؟
وهاتنشرى هدومك ال(خاصه) ازاى ...؟
ولما النور يقطع هاتعملى ايه ؟؟؟
خامسا
كل ما سبق مالوش لازمه نناقشه لان اصلا اول نقطه وهى الحرام شرعا قطعت الموضوع شكلا وموضوعا .. بس البنوته الكيوت كانت بتقول ان كل واحد مسئول عن نفسه ويقدر يحمى نفسه ومش كل الناس وحشه وتفكيرها وحش
عاوز بس اقولها انزلى لارض الواقع يا سوسو
واعرفى ان الشاب وهو راكب الميكروباص جنب واحده .. بيدعى ان المكيروباص يلبس مطب عشان رجل البنت تتهز وتخبط فى رجله !!!
جارى أمركتنا .. تتأمرك افكارنا ..
شباب بيبث سمومه والفضائيات اصبحت بيت الدعاره المقنن لعرض وبث تلك السموم
حاله فرديه لشخص او اتنين عايشين مع بعض فى الحرام
نستضيفهم ونقول ان دى حاجه اسمها المساكنه وبتحصل فى كل العالم
وياترى نسمح بيها فى مصر ولا لا ...؟
للاسف .. داعش والصواريخ والفلوس والمخدرات والاخوان ورابعه والارهاب وكل دا مايوقعش بلد .. انما الاعلام كفيل يجيب ابوها ارض ارض !
E>E
Eslam Elbahrawy
منشور by Eslam Elbahrawy.
