الدجال فى كل بيت - صدفه فى ذكرى وفاة عبد الناصر جعلتنى ارى الدجال وجها لوجه
** دجال - والله دجال !
- زمان لما كنت فى الابتدائى .. والشىء بالشىء يذكر
كنت فى مدرسة ابو بكر الصديق فى طنطا
كان عندى أبله شاهيناز مدرسة العربى والدين
- فى حصة الدين كانت بتكلمنا عن الدجال
وكانت دايما قصتها الشهيره ان الدجال جنته نار ... وناره جنه
كانت تقولنا ان الدجال بمشيئة الله ربنا هايعطيه مزايا عشان يثبتله انه مهما وصل من قوه برضو بمشيئة الله وارادته وبرضو هاينهزم
- كانت بتحكيلنا ان الدجال لما ينزل ويحاربنا المؤمن بس اللى هايقدر يكشفه
فكنا نسأل هانعرفه ازاى يا أبله ؟
قالت هتلاقوا مكتوب على وشه كلمة كفر ك ف ر
وهايسألكم تنضموا ليا وتدخلوا جنتى ولا تبعدوا عنى وتدخلوا نارى؟
وكان تكمل وتقول
المؤمن هايبقى عارف انه دجال هايقوله مش جاى معاك والمؤمن يدخل جنة ربنا
اما اللى ايمانه ضعيف هايقوله اختار جنتك وبعد ما يمشى معاه يكتشف ان جنة الدجال دى نار جهنم !
- كل دا دار فى بالى لما كنت بفكر فى فيلم ناصر 56 و فيلم احنا بتوع الاتوبيس
ولقيتنى عامل زى الكوره اللىي بتتحدف فى ايد التلفزيون .. الدجال !
- لو انت مالحقتش عصر عبد الناصر ولا شوفته
لو فتحت فيلم احنا بتوع الاتوبيس هاتكره عبد الناصر وايامه والبلد كمان معاه
ولو فتحت فيلم ناصر 56 .. هاتحب عبد الناصر وتعرف ان اد ايه كان زعيم وطنى
- حسيت اننا متسلمين تسليم اهالى فعلا للدجال
جنته نار وناره جنه .. فهمت معنى جملة أبله شاهيناز
كانت تقصد انه بيزيف الحقايق ويقدر يقلبها بين حق وباطل فى اى لحظه
دا اللى حسيته وشوفته فى ذكرى رحيل الرئيس عبد الناصر اليومين اللى فاتوا
لما لقيت قنوات بتعرض فيلم ناصر 56
وقنوات تانيه بتعرض فيلم احنا بتوع الاتوبيس
__ البوست مش عشان يحصل خناقه بين مؤيدي و معارضي عبد الناصر
ولا عشان نقيمه بعد السنين دى كان كويس ولا وحش
انا بتكلم فى نقطة التزييف او التلاعب بالعقل من خلال مشهد في فيلم
- عشان كده ...
ابحث بنفسك .. حكم عقلك وضميرك
افتح كتاب واتنين وعشره ومليون
اياك تستسلم لفيلم او تصريح او استطلاع
احنا فى زمن الدجال اللى قادر يغيب العقول ويزيف الحقايق
E.E
Eslam Elbahrawy
