بالصور - من هى السيده التى تبرعت بكل ما تملك لصالح مستشفي مجدى يعقوب - وقصة جفاء ابنها وهجره لها
والله تستاهل منكم كلمة شكرا على الاقل .. جايز تشوفها منكم
الأم والدة الإبن الجائر .. تنقذ ارواح ابناءكم !
=============
✅✅ بنقابل ناس فى حياتنا كل يوم بيدوسوا علينا فعليا عشان الجنيه .. رغم انك بينك وبينهم الوهم اللى بيسموه عيش وملح !
✅✅ ناس بتتجبر وناس التناكه واخداها وناس بتطلع الدصقه وهى بتذل الناس بيها
✅✅ وفى وسط كل دا .. تلاقى اللى بيسيب ملايين ويمشي
اللى يسيب كل اللى عنده عشان عيالكم يتعالجوا
✅✅ صاحبة الصوره هى السيده رجاء محمد عقرب
قصتها غريبه شويه ..
اتجوزت وربنا لم ينعم عليها بنعمة الانجاب
بعد سنين جواز .. وجدت زوجها جايب لها طفل وبيقولها انه تبناه عشان يربوه
وبعد سنين من تربية الطفل اكتشفت انه ابن زوجها !
قررت تنفصل عن الزوج ولكنها صممت تكمل تربية الطفل :)
✅✅الطفل كبر وبقى شاب .. ومابقاش يراعيها ولا يسأل عليها
حتى على حسب قولها .. حتى كلمة ماما مابقيتش تسمعها منه
بقى ينده لها بإسمها وبشكل فج !
✅✅عاشت لوحدها بعد انقطاع ابن زوجها اللى ربيته عنها
وشافت فى يوم اعلان للاطفال المرضي فى مستشفي مجدى يعقوب
وكانت المفاجأه .. انها قررت تسافر تقابل دكتور مجدى يعقوب
وقامت بالتبرع لكل ما تملكه لصالح المستشفي
مبلغ مليون جنيه نقدى
وشقه تساوى 4 مليون جنيه لصالح مستشفي مجدى يعقوب
اتبرعت بخمسه مليون جنيه كامله
✅✅ ومع ذلك اللى خلى عيني دمعت فعلا
انها لما سألوها ليه عملتى كده
قالت ماليش حد .. ونفسي لما تتعمل حاجه زى دى
تبقى صدقه جاريه لصالح ابنى ( ابن جوزها ) اللى مش بيسأل عليا
تتكلموا عن الحب والعشق والغرام مليون سنه .. ماعتقدش حد فيكم ممكن يوصل لحنية وطيبة قلب الام اللى مابيعرفش يكره حتى لو مش ابنها من دمها :)
✅✅ قولولها شكرا .. قولولها ربنا يجازيكي خير دنيا و اّخره
خمسه مليون جنيه .. فى عمليات على الاقل بتتكلف 100 الف جنيه
يعنى فى المتوسط ...تبرعها دا يعمل 50 عمليه
يعنى انقاذ 50 روح
يعنى تحويل تعاسة 50 اسره .. لسعاده
يعنى 50 راحه وكرامه ل 50 اسره بتنام عالارض فى مستشفيات مستنيه دورها فى العلاج
يعنى 50 تكافل ورحمه وناس بتحس ان الامل فى ربنا دايما كبير
يعنى 50 روح بتخدم فى البلد وبتشتغل فيها
يعنى 50 اسره فى المستقبل.. لان الطفل المريض لما يتعافى هايتجوز ويخلف
✅✅ عن نفسي انا ...
بقولها شكرا.. وربنا يخليكي .. وربنا يريح قلبك زى ما هاتريحي قلوب العشرات من الاطفال واهاليهم
وربنا يرزقك الستر والصحه فى الدنيا
ويرزقك جنته ونعيمه عند لقاءه
شكـــــــــــــــــــــــرا
E.E
