ازمة فجر السعيد و نجلاء فتحى - بين ادمن انا اسف يا ريس و الشعب المصرى
كريم حسين ادمن انا اسف يا ريس .. شكرا لانك لم تخذلنى
فجر السعيد ونجلاء فتحى .. والموضوع من الاخـــــــــــــر !!
===========
طبعا كله عرف موضوع الخناقه الفيسبوكيه اللى حصلت بين فجر السعيد الكاتبه الكويتيه وكم هائل من المصريين على السوشيال ميديا بعد انتقاد فجر السعيد لصورة نجلاء فتحى بشكل فج بعض الشىء
===========
كعادتى معاكم مش بحب اتكلم فى القضايا اللى فيها زعيق كتير الا لما تتنسى عشان اعرف اقول رأيي
بتاريخ 24 ابريل مع بسمه وهبه فى القاهره والناس كان موجود نقاش حول الواقعه دى وكان موجود كريم حسين ادمن صفحة انا اسف يا ريس
==============
فى البدايه .. تعجبت كثيرا من وجود كريم حسين فى الحلقه لان موضوعها لا يخص مجال حديثه بإعتباره دائما يظهر فى الاعلام للدفاع عن الرئيس مبارك
وصممت على مشاهدة الحلقه لان انتابنى الشك ان كريم حسين حضر للدفاع عن فجر السعيد فقط لانها تحب الريس مبارك !!
============
توقعى كان نتيجة سوابق كتير كتبت لحضراتكم عنها
وهى ان بعض و اكرر بعض من محبى الرئيس مبارك والفريق شفيق
احيانا بيفضلوهم على مصلحة الوطن
لدرجة ان ناس منهم تقبل اهانة مصر والرئيس السيسي وتقبل الكوارث عشان يشمتوا وكأن دا بيرد الحق لمبارك وشفيق !
==================
لكن بصراحه فوجت ان كريم حسين كان موضوعى جدا
وكمان أقر بخطأ فجر السعيد وانها اخطأت فيها كتبته على صفحتها من بوستات اهانه للمصريين
بل انه اتكلم فى نقطه مهمه جدا ياما صرخنا منها وهى اهانة الرمز..وهانجيلها اخر البوست
لذلك انا حبيت احييه على موضوعيته
وكمان كان نفسي اعمل مداخله
عشان اقول لمحامى فجر السعيد ابقى ذاكر القضايا الاول يا فندم قبل ما تخرج تتكلم فيها
وعشان اقول للاستاذه هناء الكاتبه الصحفيه .. الموضوع اه مصريين و ايد واحده بس الافوره مش حلوه .. مش لدرجة انك تقولى ان الشوارع كانت فاضيه فى مصر لان الناس انشغلت بالرد على فجر السعيد لاهانتها لنجلاء فتحى !
الرحمه حلوه برضو :)
====================
خوفى من وجود كريم حسين كان نتيجة استنتاجى لبوستات فجر السعيد
اللى بالمناسبه موجوده عندى فى قائمة الاصدقاء من زمان
لان فجر السعيد بعد بوست نجلاء فتحى .. لما حصل هجوم عليها
حاولت تستخدم خدعه مش حلوه .. وهى تقسيم المصريين
هى عارفه ان تقريبا كل المصريين بيكرهوا 25 يناير واللى عملوها
فكتبت وقالت ان الهجوم عليها جاى من بتوع نكسة يناير
وبيصفوا معاها حسابات لانها بتحب الرئيس مبارك !!
================
لكن الحيله لم تنجح
لان فجر السعيد كانت انكشفت للمصريين من زمن ليس بالبعيد
فجر السعيد لم تكن معروفه فى مصر
وحبها للرئيس مبارك وصورها معه جعل المصريين يعرفوا الطريق الى حساباتها على مواقع التواصل ...
ثم .... يأتى الرئيس السيسي فتؤيده بشده
ولكن بعد حملة نزع الاراضي اللى عملها الرئيس السيسي
وكان من ضمنها اراضي لفجر السعيد كان اعطاها لها الرئيس مبارك
انقلبت تماما .. وبدأت فجر تهاجم بضراوه
بل وصل الامر انها قعدت فتره طويله .. يوميا بتنزل بوستات مدح للشيخه موزه وانجازاتها وانجازات قطر بل وبتهاجم السعوديه كمان !
موضوع الاراضي جاء حسب تأكيدات وسال الاعلام اللى قالت :
ويشير البعض إلى تبني الإعلامية الكويتية الهجوم على مصر نتيجة إجهاض مشروع كانت إحدى المساهمين فيه بمصر، حيث قيل إنها كانت إحدى الشركاء في مشروع 36000 فدان التي تخصصت (للشركة المصرية الكويتية ) بثمن قليل بين العياط والبدرشين بحجة التنمية الزراعية.
وفور تشكيل لجنة محلب لاسترداد أراضى الدولة المنهوبة، قدرت اللجنة ولكن الشركة الكويتية رفضت دفع الثمن الحقيقي للأرض فاستردت مصر 28000 فدان من أصل الـ 36000 فدان، وتبقى للشركة الكويتية 8000 فدان فقط.
===================
شوفوا ... انا لو فكرت فى الموضوع كنجلاء فتحى الفنانه
عادى .. فنانه ولازم الكل ينتقدها دا عادى فى كل حته
لكن فى حياتها الشخصيه لا
وكمان .. لو فكرت فى الموضوع ان نجلاء فتحى جوزها يبقى حمدى قنديل
اللى معروووف جدا مواقفه السياسيه !
كنت قلت يلا تستاهل بسبب جوزها
لكن ...
الامر عندى توقف عند كونها مصريه
فنانه لها تاريخ
سياسيا مالهاش رأى يخلينا نزعل منها او نقول انها ضد البلد
يبقى لما تتهاجم .. ويتم استخدامها من شخصيه غير مصريه
من اجل الايقاع والتفريق بين المصريين
يبقى لازم اتكلم
==================
فجر السعيد كان ممكن تنهى الموضوع بإعتذار انها خانها التعبير فى كلامها عن شكل نجلاء فتحى بعد ما كبرت بالسن ..
لكن عاندت ونزلت بوستات زى الزفت
بل وحاولت تقسم الناس.. وتقولهم اللى بيشتمونى بتوع يناير..واللى معايا بتوع 30 يونيو .. ورجعتنا تانى لمسلسل التقسيم
=============
احنا مابنقبلش ان حد يتاجر بينا
احنا ننتقد بعض جوا بعض .. لكن مابنسمحش لحد يتدخل فى شئوننا
احنا عمرنا ما بنغلط فى حد من بلاد تانيه
احنا لما بنتكلم فى سياسه او فن عن البلاد التانيه بنكون محترمين جدا
فجر السعيد كويتيه لكنها لا تمثل شعب ودولة الكويت
==============
اخيرا... تأكيد لما كتبته منذ فبراير 2011 وحتى اللحظه اكرر كتابته دوما
عندما رأيت المتظاهرين فى ميدان التحرير يرسمون نجمة داوود على صورة مبارك ويدوسون عليها بالاقدام .. وانتشرت الصور فى العالم
كتبت : اللى مالوش كبير بيشتريله كبير
واحنا دوسنا على صورة الرمز بتاع البلد اللى هو رئيسها
يبقى نتوقع ان فى يوم من الايام كل الناس هاتستحل عرضنا وكرامتنا
وقد كان ..
دويله زى قطر شافت نفسها علينا
اثيوبيا .. بقت تناطحنا راس براس
وكاتبه من الدوله دى على صحفى من الدوله دى ومصر كانت متجهه لملطشه
منذ يناير 2011 والاخلاق فى انحدار
مفهوم الحريه مختلط بمفهوم الفوضي
كانت تلك احد مكاسب نكسات الربيع العبرى
==============
E.E
Eslam Elbahrawy
